Den un conversacion cu SOLO DI PUEBLO a hiba cu Sr. Diego de Cuba di sindicato STA, el’a confirma di a reuni cu Minister Bikker riba e problema na Iasa, relaciona cu impase cu tin entre trahadornan y directora Sra. Pope. Minister Bikker a compronde e situacion y a bini cu un sugerencia, pa cual sindicato y delegadonan a accepta como un solucion temporal. E concluion di e ruenion cu Minister Bikker ta cu Sra. Pope tin cu bay. Tambe a papia riba cosnan pendiente y promocionnan, etc, pa cual Minister a bisa cu e ta bezig cu cosnan pendiente y muy pronto lo bini contesta y claridad riba e cosnan pendiente. E reunion a bay den bon ambiente y minister tabata receptivo, Diego de Cuba a bisa. Delegadonan tambe a haya oportunidad pa splica minister.
Finalmente Sr. Diego de Cuba a bisa SOLO DI PUEBLO, cu e cambio ta na caminda na Inmigracion. SOLO DI PUEBLO ta conclui cu Sra. Pope lo wordo movi di su posicion muy pronto.
Pero ken lo bin na su lugar?
Loke cu nos no a logra confirma ta e hecho cu Minister lo pone un management team cu lo bay draai Inmigracion pa un tempo, pa asina por restablece bek e confiansa y orden na pia di trabao.
Desde varios luna caba, trahadornan di Inmigracion ta keha riba e actitud di Sra. Pope, unda e keho cu regularmente ta bini dilanti ta cu e no por trata hende na bon manera. Esaki a causa un impase serio unda mayoria trahador a firma contra su persona y a pidi Minister Bikker pa intermedia den e impase aki.
