Ta interes di ken Josefina kier defende?
Recientemente SIMAR a manda un carta pa Gobierno, unda cu diripiente nan kier bula aden, den asuntonan di WEB.
Nos no sa si nan tin reperentacion den WEB, of nan kier haci competencia na SIWA, of si acaso Josefina su casa ta traha na WEB of te compay.
Un carta largo cu masha hopi punto, cu SIMAR ta desaproba, tilando Gobierno di no tin prioridadnan figa, pasobra enseñansa ta mas importante.
Den corto, nos tin cu bisa: Un carta basta ridiculo, pa bay mete den asunto cu no ta concerni SIMAR.
E prome contesta cu Gobierno mester duna SIMAR ta: Manda nos cuanto miembro bo tin na WEB, pero pone tambe cuanto miembro SIMAR tin, pasobra te cu awe, pregunta di Rocco Tjon den parlamento a keda sin wordo contesta, esta “Cuanto miembro SIMAR tin?”.
Un pregunta asina simpel, Josefina a sali na careda y no kier contesta y no kier ta transparente cu comunidad. Pero di otro banda si ta exigi transparencia den asunto di WEB.
Manera tur hende sa, retiro di dos director di WEB no ta bay zomaar pa gusta of pa pret. Ora bo agenda retiro di dos director, ta pasobra bo mester por tin bon motivacion pa haci tal.
Berdad ta cu tur hende ta contra di Green Handshake, pero esey ta loke a wordo hereda di gobierno di AVP, cu tabata parti contract abusivo y desventahoso rond.
Berdad ta cu tur hende kier sa mas informacion, cual ta na su lugar pa pueblo haya sa tambe! Pero, pa SIMAR hinca pia cu man den asunto di WEB, nos ta haye simplemente dimas.
E stigma tey caba cu SIMAR ta contra di tur loke Gobierno haci. Nan mester tene cuidow cu si loke ta pasando, no ta na favor di propio miembronan di SIMAR, pasobra, nos ta duda cu miembronan di SIMAR lo gusta keda den blackout.
Pues, e mensahe ta bay pa SIMAR; Percura pa cumpli cu bo statuut y defende bo miembronan. SIMAR no ta esun yama pa mete la pata den asunto di WEB.
