Un feliz anochi. Cu protocol sirbi mi ta continua.
Un cordial bon bini na e Manisfestacion Cultural pa conmemora y celebra e di 49 aña di ‘Dia di Himno y Bandera’ riba 18 di maart.
Dia di Himno y Bandera ta un dia hopi importante pa nos Pais, ya cu riba e dia aki nos pueblo ta uni pa asina duna honor na nos Himno y Bandera y celebra e orguyo di ta Arubiano. Riba Dia di Himno y Bandera nos ta honra e simbolonan cu ta representa nos patria: nos himno, nos bandera, nos escudo, nos moneda, y mas importante, nos ta celebra ken nos ta como Pais y hende, nos identidad.
Dia 18 di maart 1976, nos bandera a wordo hisa y nos himno “Aruba, Dushi Tera’ a resona pa prome biaha den Wilhelmina Stadion, awo Stadion Guillermo Prospero Trinidad na Dakota. Aruba su mesun Himno y su mesun Bandera a duna nos Pueblo e aliento necesario pa sinti nos mes mas identifica cu Aruba. Esaki tabata un
un paso crucial pa logra nos autonomia den Reino Hulandes. Un vision di e arkitecto di nos nacion sr. Gilberto François ‘Betico’ Croes pa uni nos pueblo pa concretisa e deseo pa ta liber. Un lucha cu nos antepasadonan a hiba pa nos,pa cu na aña 1986 Aruba a keda concretisa den un Status Aparte den Reino Hulandes, un victoria pa nos identidad.
E aña aki nos a scohe como tema ‘Ban celebra ken nos ta, nos identidad’. Pero ken nos ta realmente? Pa compronde ken nos ta, nos mester mira bek den historia. Aruba ta un isla cu un historia unico y diverso, forma door di e diferente grupo di persona cu a yega aki atraves di siglonan. E indigenanan Arawak ta e prome habitantenan den e historia cultural rico di nos Pais. Despues a sigui e colonisadornan Spaño y Europeo, esclavonan Africano y imigrantenan di tur parti di mundo. Cada un a trece cune su cultura y tur a sirbi pa forma nos identidad, e hende cu nos ta na Aruba.
Nos ta fuerte, creativo, trahado, resiliente, orguyoso y cordial. Nos historia ta conta cu nos a uza nos man y forza pa cultiva, pa traha den industria di oro, aloë, fosfaat y petroleo, y ora mundo a pensa cu refineria a cera y cu nos lo a bira pober atrobe, ata nos a crea un industria di turismo pa carga nos economia y desaroya nos Pais.
Nos secreto special pa logra nos metanan como Pais ta sinta den e forza cu ta biba den nos y cu ta keda expresa den nos sonrisa y trato cordial cu ta wordo masha aprecia pa nos bishitantenan. Aruba ta conoci pa yama Bon Bini tur aña na hopi turista y mitad di nan ta bin Aruba tur aña. Ora bo puntra nan, ta dicon nan ta bin semper Aruba, dus kico ta haci nos Pais special pa nan, bo lo kere cu e contesta lo ta “for the Sun, the Sea and the Sand.” Sinembargo nan contesta ta otro, nan ta bin for the Soul, e manera amical y cordialidad sin igual cu nan ta topa na Aruba ta locual ta pone nan bishita Aruba asina hopi. Ta nos sonrisa y nos trato cordial, ta locual ta gana e curason di nos turista den cada bishita.
Nos identidad ta refleha tambe den nos idioma Papiamento, un idioma cu ta conta cu e diversidad di palabra den cual cada ken biba na Aruba por sinti su mes representa, aunke ta otro tera por a mira nan nace.
Papiamento ta simpel y fuerte alabes ta tene nos uni como Pueblo. P’esey ban dune su honor, ban papia y skirbi Papiamento, ta nos forza y parti di nos identidad e ta representa.
Nos identidad ta nos pasado, nos presente y tambe nos futuro. Den un mundo na unda tur cos ta cambia lihe, nos mester keda nos mes y mantene nos identidad, cu ta locual ta haci nos special. Nos tin un responsabilidad siña nos hobennan di nos herencia cultural, pa honra nos tradicion y conoce nos historia. Como mayor laga nos siña nos yiunanpa balora nos idioma, nos cultura, nos musica, nos arte y nos custumbernan. Conta nan con antes nos grandinan tabata biba, pa e historia aki keda conserva.
Siman pasa mes Minister President y mi persona a bishita scolnan en conexion cu e celebracion di Dia di Himno y Bandera, y nos a keda hopi contento di mira e dedicacion di e docentenan pa inculca e amor pa Aruba cerca nos muchanan. Laga nos sigui siña nos yuinan pa stima y cuida Aruba.
Laga nos ban celebra ken nos ta, celebra e regalo mas grandi cu nos antepasadonan a dunanos, nos historia, nos identidad.
Brinda semper honor y respet na nos bandera, canta y biba e letranan di nos himno.
Mi kier a extende un invitacion na un y tur pa bini hunto mayan 9’or di mainta, pa bin rindi honor y respet na nos Himno y Bandera durante e Acto Protocolar. Bin presencia un tremendo programa y desfile di varios gruponan uniforma. Pa despues core rond den nos autonan cu bandera di Aruba y bisti nos t-shirt di Dia di Himno y Bandera cu hopi orguyo y asina bishita e diferente actividadnan cu ta wordo organisa rond di nos isla.
Awe nochi un bes mas, Comision Celebracion Dianan Nacional y Departamento di Cultura a organisa e bunita anochi aki, cu artistanan cu lo demostra nan talentonan y tambe nan amor pa nos cultura. Masha danki pa e bunita celebracion aki. Un palabra di agredicimento ta bay tambe na tur e patrocinadornan cu e contribui na e Manisfestacion Cultural aki. Un danki tambe na tur cu ta enrikese nos cultura cu benta di cuminda y artesania. Y tambe un danki na e dushi publico cu ta presente y cu ta sigui nos atraves di nos planta nacional.
Nos identidad ta nos forsa, nos orguyo, y nos legado.
Ban brinda respet y honor na nos Himno y Bandera.
Ban celebra ken nos ta, nos identidad!
Pabien Aruba!
Feliz Dia di Himno y Bandera!
Cu Dios sigui bendiciona cada un di nos y nos Pais Aruba!
