Prome Minister Evelyn Wever-Croes:
Su excelencia Gobernador, sr. Alfonso Boekhoudt y distinguida esposa;
Honorable Presidente di Parlamento, sr. Edgard Vrolijk;
Coleganan Minister di Gabinete Wever-Croes 2;
Coleganan Minister di Corsou, sr. Gilmar Pik Pisas, Minister President, y coleganan Minister Ruthmilda Larmonie y Javier Silvania;
Miembronan di Cuerpo Consular;
Y henter e comunidad di Aruba, un feliz mainta y un feliz dia di Betico.
GILBERTO FRANCOIS “BETICO” CROES, UN TATA PARTICULAR, DI HENTER ARUBA
Awe nos ta celebra e fecha natalicio di Gilberto Francois “Betico” Croes, cu si e tabata na bida, e lo a cumpli 85 aña. Sinembargo nos sa cu su destino tabata diferente, y el a bay nos dilanti na edad di apenas 48 aña.
Riba e dia aki, mi kier para keto na e bida y e lucha di Betico Croes, cu danki na su determinacion, perseverancia y danki na e sosten di un pueblo uni, a logra cosnan grandi pa Aruba; a logra cu awe nos ta biba den un pais autonomo den Reino yama Aruba.
E logro mas grandi cu nos ta atribui na Betico, ta nos Status Aparte. Ta danki na nos Status Aparte nos por a desaroya nos pais den un di e paisnan lider den nos region.
Un persona cu den un bida corto, a laga un legado grandi, tipifica pa su determinacion, perseverancia y lucha pa union.
Betico tabata un tata di 4 yiu, un esposo, yiu, ruman, y e tabata mi omo y mi padrino di bautismo. E persona cu un carisma enorme, semper cu atencion pa tur hende, mescos cu ta su mesun yiu. e mes a bisa den un di su discursonan cu nos ta considera un di su discursonan di despedida den Ser’i Noka, cu e no ta un tata di un hogar di mama, tata y 4 yiu, sino un tata particular, di henter Aruba. Y esey e yiunan di Aruba cu a conoce tambe a sinti.
BAN SIGUI CU E PRINCIPIO Y E BALORNAN CU BETICO CROES A MUSTRA NOS
Como politico Betico Croes a demostra con ta lidera cu curason, poniendo e pueblo, e ser humano na prome luga. Con ta lidera cu respet pa otro, dunando respet y exigiendo respet.
El a mustra nos cu mester duna espacio na hende muhe den politica, pasobra mas participacion di hende muhe den politica y den puestonan importante den gobiernonan, ta trece un miho balance den toma di decisionnan cu ta concerni nos tur, homber y muhe.
El a mustra nos con pa bo logra bo meta, bo mester tin biaha dal algun paso chikito atras, pa despues bo sali cu pasonan grandi padilanti. El a siña nos e importancia y e balor di stima nos pais, y nos simbolonan di libertad, nos himno y nos bandera.
Betico a mustra nos e importancia di union, pasobra – manera ela bisa – un pueblo uni hamas lo ser venci. Union entre famianan, union entre oponentenan politico, union entre esnan cu a nace aki, y esnan cu no a nace aki. E mes a bisa, Arubiano no ta esnan cu a nace aki so, sino tambe esnan cu a haci di Aruba nan hogar.
Awor ta na cada un di nos pa sigui cu e principio y e balornan cu Betico Croes a mustra nos, y cu a conduci na logronan grandi pa nos pais.
E LUCHA PA STATUS APARTE DI NOS PAIS
Betico Croes no a cuminsa cu e lucha pa Status Aparte di nos pais. Politiconan grandi prome cu su tempo ya a cuminsa expresa e deseo di nos pueblo di ta ‘baas’ den nos mesun cas. Sinembargo e lucha cu a cuminsa den añanan 40, a wordo bandona, y ta Betico den añanan 70 a gara e bandera di e lucha ey, y a hib’e te na su final.
El a haya e fundeshi di e lucha construi, pero debi na abandono e fundeshi tabata den mal condicion. El a fortifica e fundeshi, el a lanta e murayanan, el a percura pa e dak y asina a construi e pais Aruba cu awe nos ta biba aden. El a entrega nos e yabi di un Pais autonomo, pero lamentablemente e mes no a biba pa por a experiencie, ni goza di dje. Nos tin e privilegio di biba den e pais autonomo, pa nos lanta nos yiunan den e libertad aki.
Den e ultimo tempo varios ciudadano ta preocupa pa e status autonomo di nos pais. Especialmente despues di e pandemia mundial, cu impacto grandi riba nos dushi Aruba. Y durante e temponan aki varios biaha mi tabata pensa, kico Betico Croes lo a haci, si e tabata den e posicion aki. Ki decision e lo a tuma. Con e lo a atende cu e situacion.
Mi no tin contesta riba e preguntanan aki, pero un cos si mi sa, Betico Croes lo ta hopi orguyoso di su pueblo, e pueblo cu e a sa di uni den un solo ideal: haci di Aruba un pais, y awor mirando con nos pueblo a uni pa saca nos pais di e abismo cu e pandemia Covid a hinca nos aden, sigur e lo ta orguyoso.
Pasobra, apesar cu Aruba tabata un di e paisnan den region mas fuertemente afecta pa e pandemia, nos ta un di e paisnan cu ta recuperando na forma impresionante. Y esaki no ta casualidad, esaki ta resultado di e trabou pisa y grandi cu cada ciudadano di nos pais ta eherce. Y di esaki, ami ta hopi orguyoso, Betico sigur lo ta orguyoso, y nos por ta hopi orguyoso tambe.
E yabi di e exito di Aruba ta union. Nos historia a demostra nos cu momentonan cu nos uni como un solo pueblo, nos ta logra cosnan grandi. Status aparte ta un ehempel, y e forma ehemplar con Aruba a atende cu e pandemia ta otro ehempel. Mas recién tin e ehempel cu momento cu Aruba, Corsou y Sint Maarten a uni den un alternativa pa e ley di Reino COHO, nos a logra cu awor esey ta for di mesa, y riba mesa tin un alternativa cu ta cumpli mas cu nos principionan democratico y respet pa nos Parlamento.
Ora mi tende “Betico”, mi ta pensa mesora riba “union”. Ohala e bida, lucha y legado di Betico, por inspira nos y crea mas union den nos pueblo, pa nos suprasa e retonan cu tin nos dilanti.
BISHITA NA SCOLNAN: BUSCA PA ENCONTRA E BETICO DEN NOS
Pa varios aña caba mi ta bishita scolnan prome cu Dia di Betico, pa admira con nan ta preparando pa e dia aki. Semper mi ta haya sorpresanan agradabel con nos maestronan y alumnonan ta esforsa nan mes pa celebra e dia aki. Por ehempel na Colegio Conrado Coronel nan a organisa un actividad cultural cantando himno, y cu canto y poesía y presentacion di discursonan di Betico, door di e muchanan mes. Of na St. Annaschool dialuna mainta trempan, ora nan ta hisa bandera y canta himno tur siman. Of na Scol Xander Bogaerts Trai Merdia, cu e storia di e bida di Betico.
Den mi bishitanan na scolnan, mi ta conta di Betico, di su bida desde cu e tabata hoben. Y mi ta splica nan cu nos cada un tin un Betico den nos. P’esey awor, den e retonan grandi aki cu nos pais ta aden, y cu nos cada un ta enfrenta den nos hogar, nos cada un mester busca pa encontra e Betico den nos. Busca e balornan, principionan cu Betico a siña nos, cu el’a mustra nos. Pa asina enfrenta e retonan actual cu determinacion, perseverancia y den union. Lucha pa bo soñonan. Nunca rindi. Si bo soño ta bo destino, no ta importa cuanto obstaculo crusa bo caminda, nos bon Dios ta yuda bo logr’e.
DANKI PA STIMA ARUBA
Mi kier finalisa cu palabranan di agradecimento. Na prome luga na colega Minister Xiomara Maduro y Comision Celebracion Dianan Nacional (CCDN) cu ta organisa e dia nacional aki hopi bunita y significativo. Danki.
Mi kier gradici nos coleganan Minister di Corsou, cu a bin Aruba pa celebra e dia aki cu nos.
Mi kier gradici tambe nos maestro y maestranan den nos scolnan cu ta inculca den nos hobennan e amor pa nan pais.
Mi kier gradici tambe tur esnan cu a lucha hunto cu Betico, y henter nos comunidad cu awe ainda tin un cariño grandi pa Betico. Danki pa sigui mantene su memoria bibo memey di nos.
Mi kier gradici tambe su famia, tur esnan cu a sacrifica pa Betico Croes por a dedica su bida na e lucha pa nos Status Aparte. Especialmente su yiunan Guisette, Glenbert, Junior y Glendeline. Awe indudablemente boso lo kier a lanta y dun’e un serenata pa su cumpleaños. Y apesar cu nada por yena e bashi cu el a laga, sa cu henter nos pueblo ta sumamente agradecido na cada un di boso pa e sacrificio cu boso a haci, y ohala cu e cariño y respet cu nos pueblo tin pa boso tata Betico, por duna boso poco consuelo e dia aki.
Na un scol cu mi a bishita, un alumno di 5e klas a puntra mi si mi conoce e yiunan di Betico. Mi a bise “si, dicon”? el a pidi mi e ora pa mi bisa boso DANKI pa comparti boso Tata cu Aruba. Y ami ta uni mi mes na e palabranan aki.
Si Betico lo tabata na bida lo mi kier bise DANKI. DANKI PA STIMA ARUBA. Danki pa lucha pa nos Status Aparte. Danki pa duna nos un dushi país pa nos biba aden. Danki pa kere den nos.
Ohala cu e dia aki por inspira cada un di nos pa por enfrenta e retonan den nos bida, y con pa surpasa nan. Y cu determinacion, perseverancia y den union.
Cu Dios bendiciona nos dushi pais Aruba.
FELIZ DIA DI BETICO
