ORANJESTAD – Diaranson atardi Minister di Turismo Sr. Dangui Oduber tabata na Aruba Airport Authority (AAA) pa haci anuncio oficial cu Sarpa Airlines lo bay cuminsa cu vuelonan pa Aruba desde Colombia. E noticia aki ta uno sumamente positivo pa Aruba su turismo caminda lo bay diversifica e mercado Colombiano cu 2 ruta nobo. Di manera aki Aruba ta sigui reconstrui e mercado importante aki creando mas conectividad entre Aruba y Colombia.
Sarpa Airlines ta existi pa mas di 40 aña, pero ta recien awor cu nan lo bay cuminsa duna servicio di vuelonan comercial. Den pasado nan tabata duna servicionan di vuelo charter y tambe di air ambulance. E aeroliña ta habriendo diferente ruta nobo den Caribe incluyendo na Corsou, pero Aruba ta e unico isla cu ta bay ricibi 2 vuelo semanal for di Barranquilla y Medellin. E vuelo inaugural lo bay tuma lugar dia 2 di januari 2022. Fuera di e 2 rutanan menciona Sarpa Airlines ta trahando dura pa logra habri un ruta directo for di e cuidad di Cali tambe.
Sarpa Airlines lo bay ofrece e servicio di 2 vuelo semanal directo pa Aruba for di Barranquilla y Medellin riba diaranson y diadomingo. E aeroliña lo ta uzando e tipo di avion jet Embraer 145LR cu tin un capasidad di 50 stul. E rutanan di Barranquilla y Medellin ta rutanan cu den pasado ya caba a yega di wordo uza, pero pa diferente factornan nan no a resulta exitoso. Sarpa Airlines ta di opinion cu como nan avion ta di 50 stul e lo ta ideal pa e ruta nan aki ta un exito e biaha aki. Sarpa tin proyecta pa trece alrededor di 15.000 turista den aña 2022 pa Aruba. Minister Oduber ta sigui diversifica nos turismo y cu e vuelonan nobo aki ta percurando pa ehecuta e vision di diversificacion.
Minister Dangui Oduber a yama un danki na e CEO di Sarpa Airlines Sr. Carlos Mesa y tambe na e propietario di e aeroliña Sr. José Roberto Luna pa duna Aruba e confiansa. Tambe e mandatario a manda palabra di elogio pa ekipo di AAA y ATA cu ta trahando duro pa Aruba keda diversifica nos mercadonan den Latino America.
