Den un sala completamente yen, Departamento di Mucha y Hoben conhuntamente cu LVAK (Landelijk Verening Aandachtfunctionarissen Kindermishandeling) di Hulanda, recientemente a duna un presentacion na e directornan of representante di e organisacion cu ta den funcion di management, tocante e rol y sosten cu un Supervisor di Codigo (SdC) tin mester na momento di ehecuta e tarea aki dentro di un organisacion. Codigo di Proteccion (CdP) ta un decreto nacional unda e profesionalnan di e sectornan husticia, enseñansa, social y salubridad ta traha uniforme segun 5 paso, na momento cu tin sospecho di abuso di mucha.
Sra. Tea Hol, directora di LVAK a comparti su conocemento y experticio di mas di 10 aña, trahando cu e Supervisornan di Codigo, of mihor conoci na Hulanda como ‘Aandachtsfunctionaris’ cu tambe mester a implementa, salvaguardia y organisa workshop pa sostene e Supervisornan di Codigo den nan rol na Hulanda. Na momento cu Hulanda a inicia cu e implementacion di Meldcode, tambe tabatin hopi reto y incerticumbre y falta di conocemento pa por traha na un manera diferente, pero preventivo y uniforme. Sra. Hol a indica cu LVAK a inicia cu a penas 40 Supervisor di Codigo y awendia tin rond di 3000 Supervisor di Codigo, cu nan ta percura pa duna workshop pa nan mantene nan licencia y tambe e organisacion haya su ‘keurmerk’.
E instancianan presente tabata: Telefon pa Hubentud – Dienst Inspectie Onderwijs – Dienst Publieke Scholen – Directie Voogdijraad – FEPOH – Respaldo – FADA – Fundacion Pa Nos Muchanan – Heart Centered Leadership Foundation – Imeldahof – KPA – Stichting Protestand Onderwijs Aruba – Reclassering – MultiDisciplinair Centrum – Bureau Traimerdia – IMSAN – Stichting voor Verstandelijk Gehandicapten Aruba – Stichting Enseñansa Preparacion Basico – Departamento di Asunto Social – Polis di Bario.
Dentro di e instancianan aki tin SdC ta ehecutando e rol y awor e directornan y management team a haya un mihor bista con esaki ta hinca den otro y tambe por a compara cu Hulanda. E SdC tin como su tareanan pa: conseha director/management y ‘beleid’ tocante e implementacion y salvaguardia CdP, ta informa tocante e meta, contenido y forma di traha cu CdP, motiva e coleganan pa uza CdP, ta conseha y guia nan coleganan den e proceso di señala abuso di mucha y monitoria e situacion despues cu haci un notificacion na Bureau Sostenemi.
DMH ta hopi entusiasma pa ta por bira un ‘zusorganisatie’ di LVAK y conhuntamente lo sigui traha na bienestar, proteccion y salvaguardia nos muchanan den un forma structural y uniforme.
