Lanta trempan, prepara e desayuno di e muchanan, hiba nan scol, bay trabou, busca nan bek, hiba e muchanan na nan actividadnan extraescolar, probecha e rato pa pasa cumpra algo y finalmente bay cas. Kisas esaki ta algun di e poco rutinanan cu un tata presente den bida di su yiu lo ta haci. Pero den realidad na Aruba, cuanto mucha por realmente bisa cu nan tata ta gran parti di nan bida diario? En conexion cu Dia di Tata, Departamento di Mucha y Hoben (DMH) ta pone extra atencion na 10 consecuencia na momento cu un tata no ta presente den bida di un yiu.
Dies Consecuencia pa un mucha cu tata ausente:
- Poco confiansa den su mes. Sin duda, un mucha lo tin un autoestima abou y no ta capaz di kere den su mes. Esaki lo ta un obstaculo grandi na momento di tuma decision importante.
- Desconfiansa den otro. Con un mucha ta bay confia den otro, si ni sikiera su tata tabata t’ey, ora tabatin mester di dje? Esaki ta desemboca den problema pa relaciona cu otro y ta hacie un mucha insigur.
- Problema di conducta. Hopi mucha ta busca manera pa haya atencion y nan ta hacie, door di transforma den ‘mucha chikito rebelde of malamucha’. Nan ta comporta malo na scol, ta uza agresividad, ta kibra regla…enfin tur loke ta necesario pa haya atencion.
- Problema emocional. E falta di cariño den infancia por genera un adolescente cu problema serio pa controla su emocionnan. Durante adolescencia nan ta enfrenta numeroso sintimento, cu por crea un personalidad fragil.
- Constante duda. Falta di tin un referencia firme den infancia, por transforma den adolescente cu hopi duda y indeciso, cu problema pa tuma decision importante y riba dje, cu un incapacidad pa compromete su mes.
- Comportacion compulsivo. E muchanan tin tendencia di ta poco racional y ta laga nan mes ta dirigi pa nan impulso. Nan ta sinti ansiedad y stress y hopi biaha compaña pa un comportamento agresivo.
- Depresion. E angustia di no tin un referente emocional band’i dje, por desencandena den un mucha cu depresion.
- Problema mental. Den caso extremo, por genera problema grave na nivel psicologico, manera trastorno di personalidad.
- Adulto dependiente den exceso. E muchanan aki ta bira adolescente cu un dependencia den un futuro pa busca un hende cu ta yena e bashi cu nan ta sinti. Esaki por conduci na buscamento di un forma no saludabel na persona cu ta cuida nan. Nan tin miedo di ta rechasa, cu ta bandona nan. P’esey nan ta capaz di sacrifica den exceso, contal di tin un hende band’i nan.
- Bashi interior continuo. Ta manera un buraco cu no ta logra tapa. Den ocasion, e falta di cariño aki di nan tata den nan infancia ta compaña nan pa semper.
Pues abo como TATA, sea biologico of no, NO LUBIDA, cu un mucha no ta su so, djis ora bo no ta na cas of den e nucleo familiar. Bo yiu ta nan so tambe, ora abo ta laga amistad, television, trabou y celular ta un gran motibo di bo ausencia! Feliz Dia di Tata.
