Minister Dangui Oduber
DOCENTENAN DI DEPORTE TA BAY RICIBI UN TRANING DEN CUADRO DI E PROGRAMA DI SCOL SALUDABEL
Dialuna mainta Minister di turismo y Salud Publico sr. Dangui Oduber a haci apertura di un programa di training pa docentenan yama “Leefstijl”. Esaki a sosode conhuntamente cu colega Minister di Enseñansa y Deporte sr. Endy Croes, Bestuur di scolnan, docentenan di IPA, representantenan di plataforma scol saludabel, docentenan di movecion y salud, DVG y Sociale Zaken.
E training aki ta wordo duna pa un profesional Hulandes cu a bin Aruba specialmente pa esaki. E training nan aki lo tuma lugar di diamars pa diabierna na Surfside Marina y nan ta wordo haci den cuadro di Aruba su plan nacional di prevencion di malesanan no transmisibel.
Leefstijl ta un programa educativo cu ta stimula y guia nos muchanan di un edad hoben riba tereno social emocional con pa hasi escogencianan saludabel riba tereno fisico, nutritional y mental.
E meta di e programa aki ta pa empodera muchanan pa ta resiliente y ta consciente di e ambiente cu tin rond di nan. E meta ta cu e programa aki lo ta uno structural den scolnan como un vak y lo ta uno duradero, segun Minister Oduber.
E programa aki lo yuda transforma nos muchanan y tambe e futuro generacion. Pa nan reconoce e importancia den cambia nan estilo di bida, pa hiba un bida mas saludabel. Pa consumi menos sucu y salo, pa participa activamente na actividadnan fisico por ehempel un deporte.
Minister Oduber a splica cu na e momento aki Ministerio di Salud Publico ta implementando e plan nacional di prevencion cu a keda lansa algun aña atras. Segun Minister actualmente ta enfocando riba 4 pilar:
- E Healty Lifestyle Center, cu a habri su porta den januari. Na e momento aki e centro aki tin 104 cliente participado activamente. E centro aki ta pa adulto caminda nan ta ricibi guia di con pa come y biba saludabel haciendo movecion fisico.
- Un otro programa cu gobierno ta financiando ta esun di Jump 18 lidera pa dr. Busari. Esaki ta hobennan di 4 aña te cu 18 aña di edad.
- Un otro bunita proyecto cu a wordo anuncia na luna di mei ta e programa di scol saludabel, e training cu ta bay tuma lugar ta un parti integral di e proyecto aki.
- Minister Oduber ta compromete pa haci inversionnan den e parti di prevencion den salud atraves di diferente campañanan. Pa asina nos por tin un comunidad mas saludabel, pa hisa e vitalidad pa tin mas productividad.
Finalmente Minister Oduber kier a gradici DVG, Sociale Zaken, Ministerio di Enseñansa, Healthy Lifestyle Center y Scol Saludabel.
