Diaranson mainta Hues a dicta sentencia den e caso Lar cu señor Richarson a cuminsa contra Gobierno.
SOLO DI PUEBLO por a compronde cu Hues ta haya cu Gobierno a actua contra ley y como tal ta hala aden e decision tuma cu ta hala e documento di integridad di Richardson aden.
NO TABATIN MOTIBO PA HACI INVESTIGACION
Hues den su evaluacion di e caso ta mustra cu segun ley, solamente si tin un un situacion incidental, lo por haci e investigacion di nobo riba integridad di un persona cu tin un funcion di confianza, den un periodo menos cu 5 aña. Hues a mustra cu diferente biaha el a puntra e abogado di Gobierno, si tabatin motibo incidental pa a haci e investigacion di integridad y e abogado a bisa cu no. Hues a mustra cu el a puntra e abogado si e keho di e dos damanan na 2024, tabata motibo cu a haci e investigacion riba integridad di Richardson. E abogado a contesta cu no y cu e investigacion tabata relaciona cu e maneho nobo cu cada 3 aña ta haci investigacion riba integridad.
Na opinion di Hues, esey ta haci cu Gobierno a viola e ley cu ta regarda e investigacion riba integridad di Richardson.
Hues a mustra cu segun e ley, cada 5 aña por haci e investigacion riba integridad y den e caso di Richardson, esey mester sosode na December 2025. E investigacion riba Richardson a sosode na 2023 y 2024 cual ta hopi mas promer cu December 2025.
DECISION DI HUES
Hues su decision ta cu e ta declara cu e protesta di Richardson tin base y cu e ta destrui e decision di 29 Augustus 2024 riba cual a protesta. Hues ta hala aden tambe e decision di 20 Mei 2024. Esey ta nifica cu Richardson ta mantene su declaracion di integridad.
Loke no ta para den e sentencia, si Richardson por bolbe ocupa su funciona di director di (NCTVI).
