Den e bida aki nos tur kier libertad, pa biba manera nos kier, pa gosa di bida, pero tin algo hopi importante cu nos mester tene cuenta cune cual ta dominio propio.
Dominio propio, Selfcontrol, Zelfbeheersing ta un fruta di Spirito Santo cual nos tur tin mester di dje, pesey ta importante pa tur hende tin Cristo Hesus na prome lugar den nan bida, pasobra un hende sin Cristo ta wordo hiba den tentacion aki y aya.Pasobra dominio propio no a alcansa su curason.
Pesey bo ta mira hopi hende ta bebe y come iresponsabel, pa motibo di falta di dominio propio.
Hende ta cudisha, papia malo, desea cos di otro hende, busca pleito sin rason, pa falta di dominio propio.
Hende kier bringa , hende kier mata, hende kier venga, pa falta di dominio propio.
Hende ta sigi den mal amistad, aunke cuanto conseho nan ricibi pa aparta for di cierto persona, nan ta continua pa falta di dominio propio.
Pa falta di dominio propio hende ta cay sera,
Hende ta bira malo,
Hende ta causa accidente,
Hende ta perde trabao.
Hende ta kibra matrimonio,
Hende ta viola,
Hende ta abusa, tur esey pasobra nan no tin control di nan spirito.
Proverbionan 25:8 ta para scirbi;Esun cu no tin dominio riba su spirito ta manera un stad basha abao sin muraya.
Un hende cu no por controla su rabia, y un hende cu no por controla su deseo carnal, ta un hende cu no tin dominio propio.
Un hende cu no tin control con e ta bisti y ta kere cu bisti sunu ta sexy y elegante no tin control riba su spirito.
Un hende cu sa masha bon cu e no por bebe, y cu alcohol ta hacie malo,y e ta bebe toch no tin control riba su spirito.
Un homber/muher cu sa masha bon cu e ta casa, y cu ta spera cu e ta fiel na su pareha, pero toch ta mete otro hende den su bida matrimonial, ta bobo y no tin control riba su spirito.Aunke cuanto su amigonan apoye, bisando cu e ta palo di homber , of un muher sabi.
Hopi biaha ora hende ta cla pa papia palabra malo , zundra y kier bringa, no ta duro nan ta, pero nan no tin control riba nan spirito.
Un hoben tanto mucha muhe como mucha homber cu ta cana drumi cu varios hende no tin control riba su spirito e no tin dominio propio.
Tin hopi versiculo den bijbel cual ta hiba nos na eherce dominio propio.Pasobra sin dominio propio hende ta bira esclavo di scuridad.
Na prome lugar laga nos tene bon cuenta locual Hesus ta bisa den Mateo 26:41: Keda vigila y haci oracion pa boso no cay den tentacion, e spirito ta boluntario ma e carni ta debil.
Pa mantene dominio propio Financiero , spaar y no gasta mas di locual cu nos ta gana: Proverbionan 6:6-8).( Proverbionan 21:20).
Pa mantene dominio propio Sexual y no ta cambiando pareha participando den inmoralidad: 1 Thesalonisensenan 4:3-5.
Pa mantene dominio propio riba comemento : 1 Corintionan 10:31 y Proverbionan 23:2.
Pa mantene dominio propio riba bebemento: Efesionan 5:18.
Pa mantene dominio propio den bistimento : 1 Timoteo 2:9.
Romanonan 12;2 ta mustra nos con mester tin dominio propio den nos bida, pa nos cana den e perfecto boluntad di Dios.
Efesionan 4:22-24 ta mustra nos dominio propio riba nos bida bieu, pa nos no wordo domina door di pasionnan bieu cu antes tabata controla nos bida.
Dominio propio ta necesario pa nos tur.
Sinceramente, Pastor Marcel Balootje
