Dialuna anochi algun rato prome cu TDQ, alarma a wordo bati pa dos atraco. Ta trata di dos Snacktruck. Uno ta Ruiz y otro ta Welldone na Tanki Flip.
Segun testigonan, tres homber, estatura mediano, cara tapa, a sorpresa personal di truck, ora ya nan ta cera y tabata ruim op.
Nan tabata arma cu pistol y cuchiu.
Na Welldone nan a bay cu rugtas y placa, mientras na Ruiz tambe a bay cu placa.
Tur autoridad a activa mesora unda tabata parando tur auto riba caminda pa control.
A pata varios auto, sin exito pa haya paradero di e atracadornan.
Ambos truck ta equipa cu camera y den vicindario tambe tin suficiente camera pa asina por duna autoridad un vista di kico a sosode y pa asina purba haya e pista necesario yega na e autornan.
For di polis, SOLO a ricibi e informe oficial aki:
Atraco arma riba Well Done Snack y Ruiz Takeway.
Dialuna anochi pa 11:05 central di polis ta wordo notifica di un atraco cu a caba di tuma lugar na Well Done Snack na Tanki Flip.
Na yegada di patruya di polis ta bin compronde di e señora trahando na e truck cu un rato prome tres (3) hende homber bisti full na preto cara tapa a comete e atraco. Nan a papia papiamento.
Dos di nan tabata tin cuchiu y un di nan un arma di candela. Nan lo a bay cu un tas di e señora cu su papelnan aden y tambe afl 200,-
Nan lo a huy na pia .
Pa 11:17 central ta wordo notifica cu un otro atraco a tuma lugar na Ruiz take away.
Ta mustra cu ta mesun tres personanan mirando cu nan tin mes un discripcion cu esnan cu a comete e atraco un rato prome na Well Done Snack.
Na Ruiz Take Away nan lo a bay cu mas o menos afl 100,-
Atraco Team a presenta na tur dos lugar y diferente patruya di polis a cuminsa cu busceda di e 3 atracaonan.
Ken cu a wak algo of sa algo jama e tiplijn di polis cu ta 11141.
. 
