E conocido palacio di domino n’e grens entre Calabas y Kudawecha, e ya mundialmente famoso Domino Square Garden, ultimo tempo a style di bira un fabrica estilo ‘lopende band’ di weganan grandi den domino! Diasabra awor, 28 di mei, no solamente lo tin final di Champion’s League, pero ‘right after’ cuminsando pa 7:30 di atardi lo cuminsa e tan spera confrontacion entre e dos eterno rivalnan Team SNOR y Team SERO BLANCO!
Papiando di Champion’s League, mester duna Snor credito di tin e berdadero ‘never give up mentality’ cu hopi biaha bo ta wak cerca futbolistanan! Si den di 90 minuut ainda bo ta kere ta posibel pa score dos gol tras di otro pa saca un verlenging afo, anto Snor t’e guy cu ainda cu score di 5 -20 ta trapa trot pa logra 16 punta den overtime! Dje otro banda, Team Sero Blanco a demostra hopi biaha di ta e team cu e clasico mentalidad di ‘Yes We Can!’ Ken cu yega ta haya semper un bataya fuerte cerca Team Sero Blanco, y no ta prome biaha cu Team Sero Blanco a pone ekiponan di nomber para straight den nan sapato! Y ta p’esey, shonnan amante di domino na nivel mundial, diasabra awor 28 di mei, ta manera hamber cu gana di come lo topa otro! Gasolin ariba candela! Niun ta baha cabes pa otro, locual ta priminti di ta otro anochi di sambombaso, di tension di corta rosea, ora e dos eterno rivalnan aki bati piedra ariba mesa!
Shonnan, manera semper, e entrada ta completamente gratis y e ya famoso snacks di half time lo lora totalmente por nada ora cu diasabra anochi 28 di mei, cuminsando pa 7:30 n’e mundialmente famoso Domino Square Garden, Team Snor enfrenta Team Sero Blanco den un bataya estilo un pa tera un pa lama! Yegaaaa trempan pa bo haya bo stoel VIP!
