Bon noticia pa e sector di patrimonio den e area Caribense. Dos museo a gana un Beca pa Museo di NWO: Saba Archaeological Center Foundation y Sint Maarten National Heritage Foundation. Esaki ta demostra cu organisacion y investigadonan di e region realmente ta bin na remarca den e programanan di NWO. Nan ta entre e diesseis ganadonan di e buelta di subsidio nobo aki.
E Programa di Beca pa Museo ta fortifica e funcion di investigacion di museo. E ta financia profesionalnan di museo pa haci investigacion profundo di nan coleccion, patrimonio y practica di museo. Ta comparti e resultadonan via publicacionnan cu tin acceso liber, di manera cu e conocemento ta beneficia sector di museo mas amplio.
Proyectonan Caribense cu a gana:
Saba Heritage Center: Pone un base fuerte pa futuro
Un di e proyectonan otorga ta procedente di Saba Archaeological Center Foundation. E proyecto “Collecting Without a Framework: Developing Collection Management and Storage Standards for the Saba Heritage Center in the Context of the Caribbean Netherlands” (Colecciona Sin un Cuadro: Desaroyando Normanan pa Maneha y Warda Colleccion pa Saba Heritage Center den contexto di Hulanda Caribense), ta bou di guia di S. Balfour.
Como preparacion pa apertura di un centro di patrimonio nobo na 2029, e proyecto ta investiga con pa duna structura na maneho di coleccion den e partinan Caribense di Reino y na Hulanda Europeo. E investigacion ta inventarisa bon ehempelnan y ta desaroya recomendacionnan pa sostene futuro Saba Heritage Center. E resultadonan mester garantisa cu ta conserva, maneha y comparti patrimonio di e isla na un manera duradero cu futuro generacionnan.
Sint Maarten: revela historia di sclavitud y emancipacion
Sint Maarten National Heritage Foundation tambe a ricibi un Beca pa Museo. S.M. Dehaney ta guia e proyecto “From Salt Pond to Emancipation: Slavery, Labour, Ruin, and Memory in the Sint Maarten Museum” (Di Saliña pa Emancipacion: Sclavitud, Labor, Ruina, y Memoria den Museo di Sint Maarten). E investigacion ta enfoca riba historia di sclavitud y emancipacion riba e isla. Ademas ta studia sitionan historico, ruinanan, storianan di famia, coleccionnan di museo y archivonan. Topiconan manera produccion di salo, bida riba plantashi y e caminda largo pa libertad ta central. E proyecto ta duna atencion tambe na historia nativo di e isla.
E resultadonan lo contribui na exposicionnan di museo mas fuerte. Asina ta haci historia di Sint Maarten accesibel pa un publico mas amplio, tanto riba como pafo di e isla.
Oportunidad pa investigado- y organisacionnan Caribense
E dos subsidionan ta demostra algo importante. Organisacion- y investigadonan Caribense por haya financiamento nacional, igual cu instancianan na Hulanda Europeo. Via diferente programa di NWO, incluyendo ‘Investigacion Caribense: un acercamento multidisciplinario’, investigadonan Caribense tambe por pidi otro subsidionan pa investigacion. E subsidionan aki ta sostene un variedad amplio di iniciativanan pa investigacion cu ta atende retonan social, fortifica desaroyo di conocemento y crea impacto den e parti Caribense di Reino.
Pabien, Saba y Sint Maarten
Felicitacion ta bay pa e teamnan di Saba Archaeological Center Foundation y Sint Maarten National Heritage Foundation. Nan proyectonan lo no fortifica solamente mas profesionalisacion di e sector di museo, sino lo yuda tambe pa conserva, comparti y compronde e historia rico y patrimonio cultural di e area Caribense miho. Nos ta desea ambos team hopi exito cu nan investigacion y ta ansioso pa sa e impacto cu nan trabou lo tin den region.
