Centro di Operacionnan Maritimo (MOC) di Wardacosta a ricibi un informe diaranson anochi ultimo cu un boto cu dos persona abordo ta perdi riba lama. E dos hombernan, un Mericano y un Hondureño, a sali for di Republica Dominicana rumbo pa Aruba diamars atardi y no a yega.
Despues di a ricibi e informe diaranson anochi, Wardacosta, debi na e ora di anochi y e visibilidat limita, a desplega e avion di Wardacosta pa e buskeda e siguiente mainta na salida di solo. A base di e ruta di boto specifica, MOC a identifica e area di buskeda y a manda e avion pa busca. E buskeda pa e boto cu a perde y e dos hombernan abordo a dura un total di tres dia, pero no a duna resultado positivo. Wardacosta a transmiti tambe mensahenan di NAVTEX y UMIBS pa botonan cerca di e area di buskeda, pero esaki tampoko no a duna ningun informacion adicional di e boto perdi of e dos hombernan.
Pa e motibo aki Wardacosta a dicidi di termina e buskeda activo. Durante patruyanan regular di Wardacosta lo keda extra vigilante den e proximo dianan, buscando e boto perdi y tambe lo sigui vigila e situacion. E centronan di rescate y coordinacion den e area di buskeda tambe ta na altura di e boto cu ta perdi cu su dos tripulantenan.
