ORANJESTAD – Recientemente Departamento di Progreso Laboral DPL a bin tuma nota di un publicacion cu a wordo haci riba medionan social cual mesora a cuminsa circula rond. Ta trata aki di un ciudadano cu a opta pa publica un supuesto conseho positivo di DPL pa un stranhero den e funcion di “Lasser”.
Minister Asunto Social y Labor, sr. Glenbert Croes a reacciona y denuncia cu e publicacion aki ta totalmente falso.DPL tambe ta declara publicamente cu e contenido di e publicacion aki ta totalmente falso, tanto e opinion di e ciudadano como e supuesto documento di DPL ta totalmente fabrica y no ta basa riba e berdad. Tipo di publicacion nan asina ta inaceptabel y no ta contribui na niun desaroyo positivo pa nos mercado laboral cu ta pasando den momento nan di reto. Ta trata aki di un documento completamente falsifica, fabrica cu nunca a wordo otorga pa DPL.
Mirando e gravedad, seriedad di e asunto aki cu ta atacha e bon nomber y credibilidad di DPL, un keho oficial a ser entrega na autoridadnan en cuestion pa asina investiga e origen y meta di dicho publicacion y documento.
DPL ta declara tambe cu e no tin niun tipo di relacion cu e ciudadano cu a publica esaki y ta distancia su mes di tur publicacion y of expresion di dicho ciudadano. Ta pone enfasis y ta recorda tur ciudadano cu falsificacion di documento nan oficial di nos Pais ta un hecho castigabel pa ley.
