Prome Minister di Aruba, mr. Mike Eman, a ricibi na su kantoor, Dr. Bahia Tahzib-Lie, Representante Permanente Suplente di Reino Hulandes pa Nacionnan Uni na New York, Merca. E bishita a tuma luga den cuadro di e conferencia di embahadornan di Reino Hulandes cu ta tuma luga diabierna siman pasa.
Durante e reunion, Dr. Bahia y Prome Minister Eman a comparti un dialogo profundo y constructivo riba asuntonan global y regional cu tin importancia pa Aruba. Dr. Bahia, cu ta conoce Prome Minister Eman pa hopi aña caba, a expresa su apreciacion pa e encuentro y pa e oportunidad pa bolbe intercambia idea cu e mandatario Arubano.
Un di e topiconan principal durante e combersacion tabata e “High Level Week” di Nacionnan Uni (UN), cu ta marca e inicio di e Asamblea General anual. Dr. Bahia a lamenta cu Prome Minister Eman no por a asisti e sesion mas recien na New York, pero a destaca e trabao positivo y representacion digno di Minister mr. Wendrick Cicilia, cu a tuma e rol di Prome Minister durante e reunionnan aki.
E Embahador tambe a pone enfoke riba e preparacionnan pa e conferencia climatico COP30, cu lo tuma luga na Brasil na November proximo. Den esaki, a intercambia idea cu Prome Minister Eman tocante e papel importante cu Aruba por tin den promove cooperacion regional y solucion sostenibel pa camio climatico.
Durante e encuentro, Dr. Bahia a expresa su admiracion pa e vision di Prome Minister Eman riba reforestacion di Aruba y su compromiso cu desaroyo duradero. Bahia destaca cu e liderato di Prome Minister ta un ehempel pa otro paisnan chikito (SIDS), cu ta busca un balansa entre progreso economico y proteccion di medio ambiente.
Dr. Bahia a extende un invitacion formal na Prome Minister Eman pa bishita New York den futuro cercano, pa sigui fortalece e lasonan diplomatico y pa sigui avansa den e dialogonan internacional cu ta na interes di Aruba y di e Reino Hulandes den su totalidad.
