E confiansa mas grandi cu un hende por tin, mester ta den Dios todopoderoso y su yiu Hesus Cristo.
Nada terenal, nada material, ningun propiedad, ningun titulo no por sostene ningun hende.
Placa na cantidad ta keda placa, y placa no por move Dios, pasobra e Spirito Santo di Dios, no ta move cu placa, tur locual cu nos tin mester ta Fe, Confiansa y curashi, pa asina nos por benficia di locual Dios tin pa nos.
Mester tin confiansa pa aserca e trono di gracia di Dios, pasobra eynan nos ta pone tur cos un banda y reconoce cu Dios ta Soberano den nos bida, y cu nos ta hustifica pa medio di e sanger di Cristo Hesus y asina nos ta ricibi misericordia y ayudo na tempo. Esey ta locual Dios kier di nos.
E tempo den cual nos ta bibando, ta asina trabahoso, cu nos metser afirma nos confiansa den Dios, constantemente, pasobra bendiciona ta esnan cu ta confia den Dios, Senjor no ta bandona esnan cu ta confia den dj’E, Senjor ta Dios, E ta nos baranca fuerte, nos unico refugio y nos unico speransa pa salbacion.
Bo ta confia den bo trabao, pasobra ta for di dje bo pago ta bini, bo ta confia den bo auto pasobra e ta hibabo tur caminda, pero bo a yega di pensa con e parha nan ta biba y toch nan no tin falta di cuminda, awel si Dios ta cuida e parhanan, nos tin confiansa cu e ta cuida nos tambe.
Wak con e mundo ta draai, wak con maldad ta avansa, wak con hende ta fria y aparta for di e caminda di Dios, y nos tin cu para firme y deposita nos confiansa den Dios.
Ora cu nos ta pidi Dios algo nos mester tin confiansa, cu nos ta ricibi di Dios:Y esaki ta e confiansa, cu nos tin Su dilanti,cu si nos pidi cualkier cos conforme Su boluntad, E ta tende nos. Y si nos sa cu E ta tende nos den tur loke nos pidi,nos sa cu nos tin e peticionnan cu nos a pidi di dj’E.( 1 Juan 5:14-15).
Hopi biaha hende no ta ricibi contesta di nan peticion, dilanti di Dios, pa falta di fe y confiansa den Dios, pasobra esun cu ta pidi Dios mester tin fe y confiansa cu Dios ta capas pa hacie.
Den e buki di Jeremias 32:27 ta para scirbi; Mira Ami ta Senjor e Dios di tur carni, acaso tin algo mucho dificil pa Mi.
Den Isaias 26:3-4 palabra di Dios ta bisa, lo bo warda den perfecto pas perfecto, esun cu su pensamento ta permanece den Bo, pasobra e ta confia den Bo.
Confia den Senjor pa semper, pasobra den Dios e Senjor nos tin baranca eterno.
E confiansa di Elias riba Monte Carmelo, e confiansa di Sadrac , Mesac y Abednego den e forno di candela, y e confiansa di Daniel den cueba di leon . Y e confiansa di Hesus den su Tata cu a lante for di mortonan, esey ta e confiansa cu e pueblo di Dios, mester tin actualmente den Dios, nos Senjor.
Tin confusion rond mundo, tin trosemento di palabra di Dios,rond mundo, pero esnan cu ta stima y confia den Senjor lo para firme.
Ta solamente den Cristo Hesus nos por deposita nos confiansa, pasobra solamente,Cristo ta salba, y den dj’E tin bida eterno.
Cristo Hesus a priminti cu nunca e lo bandona nos, semper e lo ta cu nos, pasobra E ta Senjor y no tin ningun manera E.
Sinceramente, Pastor Marcel Balootje
