E siman aki profesionalnan medico, epidemiologonan y diseñadornan di maneho di Aruba, Boneiro, Corsou, Saba, Sint Maarten y Statia ta bin hunto na Aruba pa e conferencia di DuCaPHEN (Dutch Caribbean Public Health Expertise Network). Den un mundo caminda virusnan no conoce frontera y enfermedadnan cronico debi na estilo di bida ta aumenta, un bon approach entre e cuater paisnan y seis islanan ta mas urgente cu nunca. DuCaPHEN ta forma e ehe crucial pa uni e forsa nan aki.
E desafionan den salud publico no ta para na frontera di un pais. Sea cu ta trata di e menasa severo di enfermedadnan transmiti pa vector manera dengue of chikungunya, of e presion social creciente di enfermedadnan cronico no-transmisibel (Non-Communicable Diseases, manera diabetes y enfermedad di curason y adernan di sanger); e islanan ta comparti e mesun vulnerabilidadnan. Door di traha hunto bo por logra mas y bo no tin mester di haci e mesun cos bo so, p’esey, e colaboracion di DuCaPHEN ta di un balor inestimabel. Door di comparti experticio, dato y rednan structuralmente, e cuido di salud y e preparacion (pandemico) den henter e region ta wordo hiba na un nivel mas halto.
Encuentro fisico ta habri caminda pa confiansa esencial
Aunke e socionan ta papia cu otro semanalmente via medio digital, e conferencia fisico na Aruba ta un paso indispensable. Contacto personal ta percura pa confiansa mutuo cu ta necesario pa por actua rapidamente y efectivamente como un solo aliansa durante un crisis di salud. E liñanan cortico cu ta wordo hiba e siman aki na Oranjestad ta forma e base tanto pa un reaccion rapido den caso di enfermedadnan contagioso como pa un strategia efectivo a largo plaso pa prevencion di NCD.
“Aruba a demostra di ta un anfitrion fantastico y sumamente profesional,” Hans Lobach, hefe di departamento na RIVM, ta bisa. “E determinacion y calor di e ekipo local di Departamento di Salud Publico (DVG) y di e socionan Caribense ta inspirador. Nos a nota esey caba durante e preparacionnan intensivo den e lunanan tras di lomba. Aki tin un fundeshi hopi fuerte di experticio caminda tur hende riba e islanan por ta masha orguyoso di dje. Nos ta mira cu nos sa unda pa haya otro mas y mas mihor, pero hunto nos tin cu tuma hopi paso ainda. Ta espectacular pa mira cu e boluntad ey t’ey completamente; simplemente door di sinta hunto den e sala aki y traha hunto pa hunto pa un futuro saludabel.”
Bista riba futuro
E conferencia na Aruba ta marca un logro importante den e colaboracion. E proximo dianan aki lo ta dedica na acuerdonan concreto di trabao, di e forma pa comparti dato y facilidadnan, y fortificacion di e rednan operacional. E meta conhunto ta keda sin cambia: un poblacion mas saludabel y resiliente riba e islanan BESCAS, caminda cada isla por conta riba e forsa colectivo y experticio di henter e red.
