Hues di Corte di Husticia a trata e caso penal cu Ministerio Publico a cuminsa contra e hombernan Venezolano J.G.P. y D.B.Q. Nan ta wordo acusa di importacion y posecion di cocaina y marihuana riba 9 Juli 2024.
SOLO DI PUEBLO por a compronde cu Fiscal a exigi 4 aña di prison pero Hues a baha esaki na 3 aña. Hues no ta haya cu por papia di complice di traficacion di droga sino complice di posecion di droga.
GUARDA COSTA A INTERCEPTA BOTO
J.G.P. y D.B.Q. ta wordo acusa cu riba 9 Juli 2024 nan tabatin cantidad droga riba un boto. Guarda Costa a intercepta e boto y a haya 693 kilo di marihuana y 7 kilo di cocaina. Ta asina cu J.G.P. y D.B.Q. tabata hunto cu otronan abordo. E otronan ya a wordo condena. Nan ta wordo considera complice di importacion di droga.
FISCAL A EXIGI 4 AÑA DI PRISON
Fiscal a bisa Hues cu e ta haya cu e droga aki mester tabata destina pa bendemento. Pa cu e castigo, Fiscal a bisa cu droga ta malo pa salud pa hende. Fiscal a exigi 4 aña di prison pa e duo Venezolano.
ABOGADO
Abogado mr. Canwood a mustra cu J.G.P. y D.B.Q. a paga 500 dollar pa bin Aruba pa traha door di e situacion na Venezuela. Na opinion di e abogado, nan no por a aleha di e situacion cu nan tabata aden. El a bisa cu nan a wordo deporta y ta riba black list.
Abogado mr. Canwood a bisa Hues cu ambos a laga sa cu pa di tanto biaha cu nan a bin Aruba pero awor si no tin intension di bin mas.
HUES A REDUCI CASTIGO EXIGI PA FISCAL
Hues a sera tratamento di e caso y a dicta sentencia di biaha. Hues a bisa cu e duo ta wordo acusa di ta complice di posecion y importacion di droga. Hues ta haya cu mester prueba cu nan tabata envolvi den e importacion. Na opinion di Hues, por conclui cu nan tabata riba un boto riba cual tabatin droga pero no por papia di complice di traficacion. Hues a sigui bisa cu e pregunta ta, si nan tabata envolvi den posecion di droga. Ta asina cu nan a aborda e boto bou circumstancianan no normal. Tabatin hendenan cu cara tapa y arma na e boto cu nan mester a aborda. Hues ta haya cu bou di circumstancianan asina, nan tabata envolvi den e transporte y esey ta posecion di droga. Hues ta haya nan complice di traficacion di droga. Hues a declara nan liber di importacion pero si culpabel di posecion. Hues ta haya importante pa combati traficacion di droga. Pa cu e castigo, Hues a bisa cu mester mira e participacion di e dos hombernan y cu nan tin sentencia anterior. Hues a condena J.G.P. y D.B.Q. na 3 aña di prison.
