Diahuebs mainta, Accion di Bario a tuma luga na Dakota, unda diferente departamento, instancia y boluntario a uni forsa pa atende cu necesidadnan den e bario y contribui na un miho calidad di bida pa e residentenan.
Den ausencia di Prome Minister Mike Eman, kende tabata den exterior, Minister Wendrick Cicilia a acompaña e ekipo di Accion di Bario, dunando continuidad na e iniciativa cu ta acerca Gobierno na comunidad.
Un aspecto special durante e edicion na Dakota ta e participacion di e generacion nobo, cu ta asumi responsabilidad y ta duna continuidad na e trabou cu boluntarionan di bario a inicia durante añanan. Un desaroyo cu merece reconocemento y estimulo, pa asina mantene bibo e balornan di solidaridad, cooperacion y compromiso cu comunidad.
Contacto directo cu residentenan
Victor ‘Toko’ Winklaar, pionero di Dakota, a expresa su aprecio pa e iniciativa y e presencia di Gobierno den comunidad, destacando e balor di e acercamento directo na pueblo.
Pa Micheal Kock, residente di Dakota, ta importante cu Accion di Bario no solamente brinda oportunidad pa residentenan trece nan preocupacionnan dilanti, sino tambe pa duna siguimento na necesidadnan identifica den bario, entre otro riba tereno di limpiesa.
Marie Brown, residente di Dakota, a expresa su gratitud pa e trabou di limpiesa y e atencion cu Gobierno ta brinda na comunidad. Segun Brown, comunidad tin necesidad di cariño y proteccion. Tambe el a expresa su aprecio pa presencia di Minister Cicilia y e continuidad di e trabou den bario.
Continuidad di un compromiso cu comunidad
Jacky Agumbero, di Departamento di Asuntonan General, a destaca cu experiencia durante e aña cu Accion di Bario a demostra e importancia di contacto directo cu residentenan, pa asina conoce e realidad y necesidadnan den cada comunidad.
Agumbero a enfatisa tambe e importancia di e transicion generacional y cu e forma di traha aki mester sigui forma parti di e maneho di Gobierno, dunando continuidad na Accion di Bario durante e añanan venidero.
Na e edicion na Dakota a participa Bureau City Inspector, Serlimar, GKMB, DTI, Polis di Bario, DPL, DOW y Luna Foundation Aruba.
Accion di Bario ta un ehempel concreto di Bon Comun den practica. Mediante cooperacion entre Gobierno, pioneronan di bario y e generacion nobo, ta sigui construi na un Aruba mas limpi, barionan mas uni y un miho calidad di bida pa tur.


























