Con ta crea un ambiente di trabou inclusivo y sigur, unda tur hende por ta nan mes, desaroya nan talento y wordo trata cu respet? E pregunta aki tabata central durante e di dos edicion di e conferencia LGBTQI+ na Aruba.
Dia 22 y 23 di oktober 2026, e ministerionan Hulandes di Asunto Interno y Relacionnan den Reino (BZK) y di Educacion, Cultura y Ciencia (OCW) a organiza un conferencia tocante diversidad na trabou, cu atencion special pa e posicion di personanan LGBTQI+. Cu e di dos edicion aki, e ministerionan a sigui riba e trabou inicia durante di e prome conferencia LGBTQI+, cu a tuma luga na Curaçao na aña 2024.
Un ambiente di trabou inclusivo, unda tur hende ta sinti nan mes sigur, respeta y aprecia, ta importante tanto pa empleadonan como pa organisacionnan. P’esey, e conferencia a reuni doñonan di empresa, profesionalnan di Recursonan Humano (HR), servicionan di salud laboral, sindicatonan, organisacionnan social, personanan LGBTQI+ y otro interesadonan for di e parti Caribense di Reino Hulandes. En total, mas cu 120 participante di Saba, Sint Maarten, Curaçao, Aruba y Bonaire a participa na e conferencia.
Di encuentro pa intercambio di conocemento
E conferencia a cuminsa dia 22 di oktober cu un recepcion pa networking, unda participantenan por a topa otro y intercambia experiencia. Dia 23 di oktober a sigui un programa di contenido cu presentacionnan, panelnan di discusion y sesionnan interactivo. E topiconan central tabata entre otro con pa crea un ambiente di trabou sigur y inclusivo, desaroyo di politica di inclusion, e rol di lidernan y profesionalnan di HR, y e importancia di personanan cu ta presencia situacionnan di discriminacion pa yuda logra cambio den cultura di trabou.
E dia a habri cu palabranan di apertura di minister Wyatt-Ras, Lisette Kuyper (hefe di departamento di Emancipacion na OCW) y representantenan di e organisacionnan Human Rights Caribbean y Workplace Pride. For di nan diferente perspectivanan, nan a enfatisa e importancia di duna atencion na diversidad y inclusion na trabou.
Compartiendo experiencia y buscando inspiracion
Ademas di e contribucionnan di apertura, a tuma luga dos panel di discusion. Den e prome panel, representantenan di organisacionnan LGBTQI+ di Saba, Sint Maarten, Curaçao, Bonaire y Aruba a comparti nan experiencia. Asina tabatin espacio pa diferente perspectivanan y desafio cu ta presenta riba e islanan.
E di dos panel a enfoca riba e rol di lidernan, profesionalnan di HR, personanan di confianza y sindicatonan den e creacion di un ambiente di trabou sigur y inclusivo. Con nan por contribui na esaki y cua ta nan responsabilidad den e organisacionnan?
Tambe a comparti ehempelnan inspirador di practica. Marriott Resort y Netwerk Regenboog di e sindicato Hulandes FNV a mustra, durante di dos presentacion di ehempelnan di bon practica, con politica di inclusion por wordo implementa den practica.
Ademas, Workplace Pride a duna dos sesionnan interactivo. Participantenan a traha riba e desaroyo di politica di inclusion y a discuti con personanan cu presencia situacionnan por hunga un rol activo den e promocion di un cultura di trabou inclusivo.
Hunto nos ta traha na ambiente di trabou inclusivo
E ministerionan Hulandes di BZK y OCW, hunto cu e Representacion di Hulanda na Aruba (VNO), e Representacion di Hulanda na Curaçao (VNW) y e Representacion di Hulanda na Sint Maarten (VNP) ta mira bek riba un conferencia exitoso y inspirador. E encuentro a ofrece participantenan e oportunidad pa intercambia conocemento y experiencia, establece contacto nobo y haya inspiracion pa sigui traha na nan mes organisacionnan riba e creacion di ambiente di trabou inclusivo y sigur.
E organisadornan ta gradici tur e sprekernan, panelistanan, organisacionnan y participantenan pa nan contribucionnan balioso.
