Premier Mike Eman a tene un reunion diamars mainta na Den Haag cu prof. dr. Kim Putters, presidente di SER Hulanda. Durante e reunion, a dialoga riba diferente tema socioeconomico cu ta relevante pa Aruba y Hulanda cu enfoke special rib’e bienestar di nos famianan riba nos isla pero tambe e poder di compra y e futuro di dialogo social na Aruba.
Prome Minister Eman a indica cu e reunion tabata hopi valioso, mirando cu SER (Sociaal-Economische Raad) Hulanda ta un partner importante pa SER Aruba. “Tin hopi tema cu SER Aruba ta ocupa su mes cu nan, cu tambe ta tema di prioridad pa SER Hulanda. E intercambio di experiencia y conocemento ta importante pa Aruba den e siguiente etapa di desaroyo socioeconomico,” asina Prome Minister Eman a expresa.
Un di e tema principal durante e conversacion tabata e posibilidad pa conecta e salario minimo na Aruba cu e “bestaansminimum”, pues e minimo necesario pa un famia por cubri su gastonan basico di bida. Actualmente e bestaansminimum na Aruba ta rond di 2.500 florin, mientras cu e minimum loan ainda ta considerablemente bou di esey. Segun Prome Minister Eman, esaki ta crea presion financiero serio riba hopi famia Rubiano. “Un persona cu solamente ta gana salario minimo awor ta confronta cu un deficit mensual significativo. Nos kier move den direccion di un sistema mas husto, unda traha duro realmente ta permiti un famia biba cu dignidad.”
Gobierno di Aruba ta consciente cu eventual aumento di salario minimo lo mester implementa esaki cuidadosamente pa no pone comercio, specialmente esnan mas chikito, den dificultad financiero. Durante e reunion tambe a discuti e posibilidadnan pa haci e aumento di salario minimo den fase y acompaña cu algun sosten.
E reunion a toca tambe rib’e concepto di prosperidad comparti un termino cu na Hulanda ta referi na bienestar amplio dentro di sociedad. E concepto aki ta mira mas aya di solamente crecimento economico, pero tambe na calidad di bida, siguridad social, igualdad di oportunidad y bienestar di nos famianan.
Prome Minister Eman a enfatisa cu Aruba ta mira crecimento den turismo y den e indicadornan macro-economico, pero cu e crecimento mester tambe sinti den bida diario di ciudadano. “Nos kier cu prosperidad no keda solamente den cifranan economico, pero cu e yega realmente na cas di hende.”
Durante e reunion, prof. dr. Kim Putters a comparti tambe experiencia di Hulanda tocante discrepancia social y e importancia di mantene cohesion social den e periodonan di crecemento economico. Como resultado di e encuentro positivo aki, a confirma cu señor Putters lo bishita Aruba den luna di november 2026. Durante su estadia e lo reuni cu SER Aruba y tambe duna un lectura publico rib’e tema di prosperidad comparti y cohesion social.
Gobierno di Aruba ta mira e colaboracion continuo cu SER Hulanda como un paso importante den fortalece e dialogo social y den construccion di un economia cu ta crea prosperidad comparti pa tur ciudadano di Aruba.
