E lider di fraccion di VVD den Tweede Kamer, Ruben Brekelmans, ta considera cu e discusion tocante bestaansminimum y aumento di salario minimo na Aruba ta un asunto hopi relevante. Esaki e a declara despues di un reunion cu Prome Minister Mike Eman y su delegacion. Segun Brekelmans, ta importante pa Aruba percura cu e entrada economico genera pa turismo no beneficia solamente e sector mes, sino cu e prosperidad aki yega na henter comunidad y cu ningun hende keda atras. Prome Minister Eman tabata acompaña pa Minister Plenipotenciario di Aruba na Hulanda, Mildred Schwengle, y Minister di Turismo, Transporte y Labor, Wendrick Cicilia.
“Dat dat zo prominent op de agenda staat in Aruba, dat vind ik heel verstandig”, Brekelmans a declara, referiendo na e atencion cu Aruba ta dedica na e asunto aki.
E lider di fraccion di VVD a indica cu Hulanda tambe ta wak con por fortalece sector turistico, mientras na mes momento percura cu henter poblacion por beneficia di e crecemento economico. Banda di e tema social y economico, e reunion a enfoca riba e posibilidadnan pa amplia cooperacion entre Aruba y Hulanda den Reino Hulandes. Brekelmans a menciona particularmente Wageningen University & Research (WUR), e region di Brainport, innovacion, tecnologia y intercambio di conocemento. Tambe a trata e posibilidad pa Hulanda comparti conocemento cu Aruba den maneho di desperdicio y proteccion di medio ambiente.
E reunion ta forma parti di e contactonan entre Gobierno di Aruba y representantenan politico na Hulanda, cu e meta di fortalece cooperacion economico y social den Reino.
