Awe mainta, dia 12 di november, Prome Minister Mike Eman hunto cu su ekipo di Accion di Bario a bishita Jaburibari, unda for di 8’or di mainta diferente departamento, instancia y boluntario a reuni pa atende cu necesidadnan den e bario. Siendo esaki un di e ultimo edicionnan di Accion di Bario di 2026, Prome Minister a probecha e ocasion pa expresa su agradecimento special na tur esnan cu durante henter aña a uni forsa pa contribui na un miho calidad di bida pa hopi ciudadano riba nos isla.
Accion di Bario ta un iniciativa cu ta acerca Gobierno na comunidad, cu e obhetivo di conoce di cerca e necesidadnan di residentenan, identifica situacionnan cu ta rekeri atencion y busca solucionnan mediante colaboracion entre diferente departamento y instancia.
Durante cada edicion, Prome Minister Mike Eman hunto cu su ekipo ta drenta den e bario, dialoga directamente cu residentenan y scucha nan preocupacionnan. E acercamento aki ta permiti pa Gobierno haya un bista mas completo di e realidad diario di nos ciudadanonan.
Un reconocemento na henter ekipo di Accion di Bario
Durante su declaracion na Jaburibari, Prome Minister Eman a dedica atencion special na e diferente departamentonan, instancianan y personanan cu durante henter aña a forma parti di Accion di Bario.
E mandatario a reconoce e contribucion di Serlimar den e trabounan di limpiesa, incluyendo recolecta di desperdicio grandi cu residentenan tin den nan cura of dilanti di nan cas, contribuyendo asina na un ambiente mas limpi y agradabel den e barionan.
Tambe a expresa su aprecio pa e representantenan di diferente ministerio, FCCA, Polis di Bario, organisacionnan social, boluntarionan y e ekipo di media cu constantemente ta acompaña e iniciativa.
Na e edicion di awe na Jaburibari a participa Bureau City Inspector, Serlimar, GKMB, DTI, FCCA, Polis di Bario, DPL, DOW y Luna Foundation Aruba.
E agradecimento di Prome Minister ta dirigi na tur esnan cu, durante cada edicion, a demonstra nan disposicion, compromiso y conviccion pa sali den bario y contribui na mehoracion di condicionnan di bida di nos ciudadanonan.
Contacto directo cu e realidad di pueblo
Prome Minister Eman a destaca cu e presencia di Gobierno den diferente bario ta brinda oportunidad pa scucha directamente e preocupacionnan di residentenan, incluyendo e desafionan social y economico cu hopi famia ta enfrenta.
Durante e bishitanan, ta surgi temanan relaciona cu costo di bida, poder di compra, condicion di vivienda y otro necesidadnan cu ta afecta bienestar di nos comunidad.
E contacto directo aki ta complementa e trabou cu Gobierno ta realisa riba nivel di maneho, particularmente den e area social y economico.
Den e contexto aki, Prome Minister a referi na diferente medida cu Gobierno a introduci pa brinda mas sosten na pensionadonan, famianan y mayornan cu tin yiunan na scol. Entre otro, el a menciona e mehoracion di e pakete di remedi y e aumento di sosten financiero relaciona cu gastonan escolar.
Tambe a referi na e trayecto pa aumenta salario minimo cu 200 florin na 2027, como parti di e esfuersonan pa fortalece poder di compra di clase trahado.
Segun Prome Minister, e medidanan aki, hunto cu e presencia continuo den bario, ta forma parti di un acercamento mas amplio pa atende cu e desafionan social den comunidad.
Un aña di colaboracion y compromiso
Durante 2026, Accion di Bario a reuni diferente departamento gubernamental, instancia, organisacion y boluntario cu un meta comun: contribui na un mihor ambiente di bida pa nos ciudadanonan.
For di limpiesa y mantencion di bario te na asuntonan relaciona cu infrastructura, vivienda, siguridad y bienestar social, e iniciativa ta promove un acercamento integral, caminda diferente instancia ta uni forsa pa atende cu e necesidadnan di comunidad.
Acercando fin di aña, e edicion di Accion di Bario na Jaburibari a brinda Prome Minister Mike Eman e oportunidad pa reconoce e balor di e trabou colectivo cu a wordo realisa durante 2026.
Bon Común den practica
Accion di Bario ta un ehempel concreto di e filosofia di Bon Común, caminda bienestar colectivo ta ocupa un luga central y caminda cada ciudadano, departamento y organisacion por contribui na desaroyo di nos comunidad.
E iniciativa ta demonstra loke por logra ora diferente instancia sali for di nan oficina, uni forsa y acerca e ciudadano den su propio ambiente di bida.
Cu un agradecimento special na henter ekipo, Prome Minister Mike Eman a reconoce e dedicacion di tur esnan cu durante e aña a contribui pa haci un diferencia den bida di hopi famia Arubiano, mientras cu Accion di Bario ta sigui cu su compromiso di atende cu necesidadnan den nos comunidad.
Mas cu un iniciativa di Gobierno, Accion di Bario ta un esfuerso colectivo cu ta fortalece e relacion entre Gobierno y pueblo, promove convivencia y contribui na construccion di un Aruba caminda bienestar di cada ciudadano ta conta.
