Kralendijk– Presidente di Dutch Caribbean Nature Alliance (DCNA) Dr. Hellen van der Wal y director di DCNA, Tadzio Bervoets, recientemente a conclui un bishita di trabou na Saba, St. Eustatius y Sint Maarten. Esaki ta e prome bishita di trabou cara a cara entre DCNA y personal y e miembronan di Hunta di Saba Conservation Foundation, STENAPA St. Eustatius y Nature Fundation desde inicio di pandemia COVID19.
Durante e bishita di cinco dia, van der Wal y Bervoets a bishita hunto cu e directornan di e respectivo organisacionnan y nan respectivo miembronan di Hunta, Anthony Reed di Directie Agricultura y Naturalesa y Deputado Comisario di Gobierno Claudia Toet di St. Eustatius y Gobernador Holiday y su representante di Gabinete na Sint Maarten. Un tema comun di e reunionnan ta e necesidad di un apoyo mas amplio pa conservacion di naturalesa den Caribe Hulandes na nivel di reino. “Ora cu ta trata di tema manera Cambio Climatico, Plan di maneho nobo di Naturalesa y Medio Ambiente y otro aspecto cu mester tene cuenta cu nan di varios isla, nos ta sigui pidi un mayor apoyo na nivel di Reino. Ainda tin demasiado pregunta di parti di e gobiernonan y Organisacionnan di Conservacion di e islanan tocante contribucion financiero pa e Plan nobo di Politica di Naturalesa y Medio Ambiente, por ehempel. Ademas, ainda tin poco of ningun mencion di Caribe Hulandes pa parte di Reino den loke ta trata e impactonan di cambio climatico. Esaki mientras cu Caribe Hulandes tin e mayor cantidad di biodiversidad ”, e director di DCNA, Tadzio Bervoets a comenta.
E miembronan den e red di DCNA a haci peticion pa un mayor apoyo pa Conservacion di Naturalesa na nivel local, regional y di Reino, specialmente considirando e papel importante cu naturalesa ta hunga den recuperacion di e pandemia global; “Hopi di e tratadonan internacional cu ta dirigi riba conservacion y clima, ta wordo haci na nivel di Reino, sinembargo, dentro di Reino tin demasiado diferencia den atencion y e enfoke cu ta duna na e islanan cu hopi biaha ta lucha pa logra nan metanan di conservacion. Aunke DCNA definitivamente tin como meta pa cera e gap aki, tambe ta depende di e respectivo gobiernonan riba tur nivel pa percura cu nan actividadnan di conservacion ta keda implementa y ehecuta di manera efectivo. Naturalesa ta di crucial importancia pa capacidad di tur e islanan pa recupera di e impactonan economico di e pandemia, y mester ta central den e plannan pa garantisa recuperacion duradero tanto di e temporada di horcan di 2017 como di e pandemia mundial cu ta andando ”, Bervoets ta conclui.
