Aruba a habri su frontera pa Merca cu 0 test positivo
ORANJESTAD, Aruba –11 juli 2020: Ayera dia 10 di juli Aruba a bolbe habri su frontera pa Merca, despues cu esaki a keda sera for di maart pa mas cu 3 luna.
Por informa cu riba e prome dia di reapertura un total di 215 turista a wordo getest aki na Aruba di cual tur test a sali negativo. Esaki sigur ta un bon comienso pa Aruba riba e prome dia di reapertura.
E proceso completo pa e turista, for di yegada na Aruba te cu salida di airport tambe a cana optimal segun plan. E proseso lo keda wordo evalua regularmente pa por brinda e miho servicio posibel pero mas cu claro teniendo na cuenta tur aspecto di siguridad.
Un palabra di gradecimento ta bay na tur organisacion, departamento, actornan y na cada persona cu a contribui na haci ful e proseso di reapertura di Aruba su frontera uno mas sigur posibel pa nos comunidad y nos turistanan.
E yamada na nos comunidad ta pa sigui cumpli cu e reglanan di prevencion cu ta ensera higiena di man, si bo ta malo keda cas y haci un test, mantene distancia fisico di minimo 1.5 meter y evita mishi cu boca, nanishi y wowo. E medidanan aki ta importante pa nos por sigui preveni cu e virus por plama atrobe riba nos dushi pais.
