ORANJESTAD – Departamento di Salud Publico DVG ta haci un suplica na tur persona cu ta bende cuminda y/of bebida sea alcoholico of no-alcoholico pa tene cuenta cu e siguiente puntonan:
• Manera ta prescribi den ley di Personeelsbesluit warenverordening: tur persona cu ta bende cuminda y/of bebida mester tin nan Certificado di Salud (“Gezondheidsverklaring”) na ordo. E Certificado di Salud mester ta vigente y visibel pa e controladornan di Departamento di Salud Publico;
• E Certificado di Salud (“Gezondheidsverklaring”) tin un validez di 1 aña;
• Na momento cu Departamento di Salud Publico haci control, e persona di e establecimento mester tin e carnet di Certificado di Salud cune;
• No ta acepta recibo como reemplasante di Certificado di Salud (“Gezondheidsverklaring”);
• Durante inspeccion si acaso no cumpli cu e rekisitonan menciona Departamento di Salud Publico DVG lo aplica sancion si ta necesario, unda tin e posibildad di asta sera e establecimento.
Ademas di e Certificado di Salud, tur establecimentonan mester cumpli tambe cu tur regla di higiena manera:
• limpieza:
• separacion di alimento;
• tur alimento mester ta bon cushina;
• uzo di temperatura cu e alimento mester cumpli cune;
• uzo di awa y alimento liber di peliger
Esnan cu mester aplica of renoba nan Certificado di Salud mester hasi un cita online via e siguiente site: www.dvg.aw
Pa mas informacion por tuma contacto libremente cu seccion di Inspeccion di Alimento y Hygiena di Departamento di Salud na telefon 5224273 / 5224274 / 5224275 / 5224279 of via email: dwh@dvg.aw
