Manera Directie Volksgezondheid (DVG) a informa comunidad caba, ultimo dianan Aruba ta experimentando rafaga di biento fuerte cu ta causando molester y incomodidad cerca hopi persona den nos comunidad.
Banda di esaki, DVG ta observa tambe aumento di stof di Sahara den nos region. Segun informacion y prediccionnan ricibi di Meteorological Department Aruba, entre diadomingo 17 di mei te cu diamars 19 di mei lo tin presencia intensivo di stof di Sahara y particulanan den aire.
Den nos tarea di supervisa riesgo pa salud publico y mantene comunidad informa, DVG ta alerta comuni cu calidad di aire por wordo afecta grandemente durante e dianan cu ta sigui. Persona cu asma, alergia, problema respiratorio, hende di edad avansa, mucha chikito y otro grupo vulnerabel den nos comunidad por experencia mas molestia cu normal manera:
- Tos
- Nister
- Irritacion di wowonan, nanishi y garganta
- Dificultad pa hala rosea
DVG ta recomenda comunidad pa tuma precaucionnan adicional durante e dianan cuta sigui:
- Limita actividadnan fisico pafo specialmente ora concentracion di stof ta halto
- Mantene porta y bentana cera mas hopi posibel
- Usa airco of ventilacion
- Bebe suficiente awa of bebe awa frecuente
- Persona cu condicion respiratorio mester sigui nan tratamento y tin nan medicamento cerca
- Busca asistencia medico si sintomanan bira mas serio of persistente
DVG lo continua traha den colaboración cu METEO Aruba pa monitor e situacion y comparti informacion oficial según ta necesario. Comunidad ta wordo conseha pa sigui solamente canalnan oficial pa informacion confiabel y actualisa.
Bo Salud, Nos Prioridad
Pa mas informacion, like nos Facebook page Directie Volksgezondheid DVG Aruba, follow nos riba Instagram directie_volksgezondheid_aruba, sigui nos den WhatsApp Channel, ricibi tur informacion den Aruba Health App, bishita www.dvg.aw, yama 5224200 of manda email na servicio@dvg.aw
