Directie Volksgezondheid (DVG) ta lansa Competencia di Arte Escolar “Doño Responsabel”, cu e meta pa educa y conscientisa muchanan tocante e responsabilidad cu ta bin cu ne pa tin un mascota.
Awe ta lansa e competencia di arte escolar. Tur alumno di klas 1 pa klas 6 di scol basico por participa gratuitamente. E muchanan mester crea un pintura original y colorido cu ta ilustra un of mas cacho y pushi den cura, cu ta wordo bon cuida pa un doño responsabel. Nan por incorpora aspecto di Ley di Cacho tambe den nan pintura, manera duna e mascota awa y cuminda adecuado, un luga sigur pa proteccion contra solo y awasero, atencion veterinario y mantene e mascota bou control.
Cada participante por entrega un pintura, cu mester wordo traha pa e mucha na scol mes. E formulario di participacion por wordo adkeri na scol mes of na DVG y mester wordo entrega na e docente no mas tarda cu 30 di september 2026. DVG lo pasa busca e pinturanan na scol dia 1 y 2 di oktober.
E ganadonan di cada klas lo wordo anuncia dia 16 oktober riba e pagina di Directie Volksgezondheid DVG Aruba. E ganadonan lo ricibi un regalo durante un entrega special dia 23 oktober, parti merdia, na Bestuurskantoor. E pintura di e ganador of ganadora absoluto lo wordo transforma den un mural riba e futuro Centro di Rescate y Control.
E competencia aki ta forma parti di e campaña cu ta enfoca riba promove responsabilidad di doñonan di mascota, pa asina preveni abandono di animalnan riba caya. Cu e iniciativa aki, DVG kier sembra for di edad tempran e mensahe cu un mascota no ta un obheto, sino un ser bibo cu mester haya cuido, proteccion y amor durante henter su bida.
Sea bo tambe un doño di mascota responsabel. Cada acto di responsabilidad ta salba un bida. Pa un comunidad harmonioso, un doño di mascota responsabel alabez.
Bo Salud, Nos Prioridad
Pa mas informacion, like nos Facebook page Directie Volksgezondheid DVG Aruba, follow nos riba Instagram directie_volksgezondheid_aruba, sigui nos den WhatsApp Channel, ricibi tur informacion den Aruba Health App, bishita www.dvg.aw, yama 5224200 of manda email na servicio@dvg.aw
