Apesar cu e virus di COVID ta wordo categorisa como un virus mas riba e lista largo di malesanan respiratorio infeccioso. Na momento cu tin aumento den caso den nos comunidad, instancianan manera dokternan di cas, SVB, hospital y demas instancianan di cuido ta sinti su efecto mesora bou di nos comunidad y pa medio di ‘opnames’ .
Den e ultimo 5 simanan cu a pasa, DVG a bin ta tuma nota cu tin aumento den casonan confirma di COVID pa medio di nos sistema di vigilancia. Un di cada tres persona cu test ta sali positivo pa COVID. For di luna di mei te cu juli 2024 hospital a resigistra un total di 27 persona cu a wordo interna debi na e virus di COVID, di cual 3 ta personanan riba 75 aña cu a keda interna den ICU.
COVID ta keda un virus di precupacion pa e grupo di personanan mas vulnerabel den nos comunidad cu ta:
- Ciudadano riba 60 aña
- Mucha bou 2 aña
- Hende muhe na estado
- Ciudadano cu ta sufri di malesanan cronico of cu tin un sistema inmunologico debil.
Na e grupo di personanan aki DVG ta conseha pa nan evita contacto cu personanan malo y evita espacionan unda tin hopi persona. Laba man frecuentemente, evita mishi cu wowo, boca y nanishi cu bo man no laba y semper laba man prome cu come.
Sintomanan di COVID ta parecido na demas virusnan respiratorio cu ta encera:
- Dolor di garganta
- Keintura
- Verkoud of nanishi ta core
- Tos
- Curpa kibra of cansa
Esun cu tin sintoma di COVID ta wordo suplica pa tuma contacto cu nan dokter di cas trempan pa esaki por monitor y guia bo den e proceso di recuperacion. Preferiblemente keda paden y evita contacto cu demas persona. No warda te ora cu bo ta sinti hopi malo pa bay pidi asistencia medico na EHBO. Cu asistencia di dokter di cas trempan por evita cu mester wordo interna den hospital.
Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na servicio@dvg.aw
