Periodismo partidista: un peliger pa democracia
Patrick y Speed obviamente ta na e top di tur plataforma di media na Aruba. Pa yega na e top bo mester ta e prome den noticia. Pa por logra mas primicia cu cualkier otro periodista Speed a soborna un polis y a corumpi un di su empleadonan. P’esey awe Speed ta un convicto condena criminalmente. E detayenan di e caso bo por lesa den e siguiente sentencianan: ECLI:NL:OGEAA:2019:455, ECLI:NL:OGEAA:2019:457 y ECLI:NL:OGEAA:2019:458. Ademas, e duo comico a suta hopi placa door di nan amistad cu Mike Eman y e partido AVP. Den e rapport forensico di Compliance & Forensic Services Caribbean di maart 2021 tocante e empresa estatal RDA, ta menciona e nomber di Patrick Paskel hunto cu otro amigonan di AVP. Tur a enrikece nan mes cu placa di nos empresa estatal. Sin duda AVP a yuda acelera e desaroyo di e plataforma di 24ora y e exito di Patrick cu Speed. Y, ora bo tin e plataforma mas grandi, bo tin un poder y influencia mas grandi cu cualkier otro plataforma. Pero, hopi poder ta bin cu un obligacion mas grandi y un responsabilidad mas serio. Ta un lastima cu pa nos duo comico, e responsabilidad aki no tin ningun balor.
Manipulacion di e agenda di noticia
Debi na nan gran influencia, Patrick y Speed tin e responsabilidad pa cuida nos democracia door di ta independiente y imparcial, pero na lugar di asumi nan responsabilidad nan ta mas interesa den un solo meta: crea un coalicion cu ta permiti AVP goberna. E motibo ta obvio, pasobra cu AVP na mando, nan lo bolbe enrikece nan mes cu yen contract lucrativo. Pa logra e victoria aki pa AVP, Patrick cu Speed ta uza nan plataforma pa publica articulonan y entrevista manipulativo pa mina nos democracia. Esaki ta inclui atake riba Ministerio Publico y nos sistema di husticia, frustra investigacionnan criminal (manera recientamente den e caso di SSA) y sabota procesonan mportante (manera esun di Ombudsman). Den nan afan pa logra nan meta, nan no ta worry cu privacidad di persona cu nunca a buska atencion publico.
Sin ningun critica periodistico Patrick cu Speed ta duna un plataforma na tur politico cu ta dispuesto pa colabora cu nan. Mira y tende Otmar Oduber, Miguel Mansur, Marisol Tromp, Gerlien Croes y obviamente Mike Eman y Benny Sevinger. E atakenan sin fin riba e cadena husticial y Hulanda tin un meta claro: normalisa e corupcion di AVP na man di e man drechi di Mike Eman, esta ex-minister Benny Sevinger. Normalisa e corupcion di AVP na man di ex-minister Paul Croes (bo por lesa e veredictonan: ECLI:NL:OGHACMB:2024:123 y ECLI:NL:HR:2023:167).
Desigualdad den acceso mediatico
Patrick y Speed ta abusa di nan posicion como guardia di e media mas grandi door di favorece nan amigonan politico: esey ta un violacion claro di articulo 13 di e Carta Mundial pa etica den periodismo. Mike Eman y su old boys network ta haya sistematicamente mas acceso na e plataforma Enfoke. Maske e siguidornan di Enfoke mes ta cansa di e storianan bieu di Mike, toch nan ta sigui pusha AVP 100%. E trato preferencial tambe ta inclui otro politiconan amigo di 24ora, manera Marisol Tromp, cu a haya “entrevistanan di puro casualidad” dilanti su cas luhoso na Malmok y dilanti un supermercado na Noord. Asina Marisol por a bende puro pelicula di teror y storia di spirito. Ta obvio cu Patrick y Speed no tin ningun aprecio pa principio di etica periodistico ni respet pa un proceso democratico husto. Nan politiconan amigo manera Mike Eman, Marisol Tromp, Gerlien Croes y Miguel Mansur no tin ningun problema cu e falta di etica di nan. Pasobra e politiconan aki ta masha contento cu Patrick y Speed ta traha duro pa nan yega na poder den un Gabinete Mike Eman III. P’esey sin duda e politiconan aki lo recompensa Patrick cu Speed cu contract di mercadeo pa paga pa e yudansa cu Patrick y Speed a brinda nan.
Operacion “bula su cabes”
Diahuebs 5 di september 2024, 24ora a lansa un operacion cuidadosamente planea pa cumpli cu e deseonan di Mike Eman y baha gobierno. E atake mediatico a cuminsa cu sensacion y speculacion riba tension den parlamento tocante e eleccion di e presidente di parlamento. Dialuna a bira cla cu Miguel Mansur, Gerlien Croes, Marisol Tromp y Mike Eman, hunto cu 24ora, tabata forma parti di e complot pa baha Edgard Vrolijk como presidente. Ta e grupo aki a fomenta e traicion di RAIZ pa causa e caida di Gabinete Wever-Croes II.
Un aliansa cu ta mina democracia
E aliansa entre e plataforma di noticia y e partidonan politico menciona, ta un peliger pa nos democracia. Un prensa independiente ta esencial pa e funcionamento di un democracia. Si prensa ta cay den man di hende cu interes politico y comercial, e arena politico ta susha. Prensa cu interes economico y politico ta causa abuso di poder, cu tin un efecto dañino riba nos eleccionnan y distribucion di poder politico.
Den e era digital, platformanan di noticia ta crucial pa formacion di desicionnan politico. Esaki ta implica cu nos mester keda alerta y critico riba e fuente di informacion. Nos mester di “watchdogs” independiente, fact checkers y periodistanan investigativo pa expone corupcion di e poderosonan – incluso den prensa. Asina so nos por preveni cu democracia ta sigui wordo mina pa manipulacion cu noticia.
Uzando SSA como arma politico
Den e siman di 23 di september 2024, como dies siman prome cu eleccion riba dia 6 di december, Patrick y Speed a lansa nan ultimo atake riba MEP den nan programa Enfoke. Dia 24 di september 24ora a publica un articulo titula “Despues di primicia den Enfoke: Stichting Sportsubsidie Aruba ta confirma investigacion riba iregularidad”. E meta di e articulo no ta meramente informativo, sino pa influencia e eleccion 2024 door di destrui reputacion di hende pa desacredita gobierno.
Dia 25 di september, Accion21 y MAS a entrega un peticion pa un Reunion Publico cu Minister di Deporte, Endy Croes, tocante e irregularidadnan den Stichting Sportsubsidie Aruba (SSA). E siguiente dia, ex-minister di AVP, Arthur Dowers a pidi Ministerio Publico pa investiga SSA y Marisol Tromp a entrega un denuncia na Miniterio Publico. E cos di mas pret ta, cu ta hustamente AVP hunto cu Marisol Tromp ta pretende di ta e solucion pa e problema di corupcion, mientras cu un periodista condena pa soborno ta duna nan su sosten.
AVP: peliger pa nos estado di derecho
Ta completamente claro cu 24ora y AVP a busca desesperadamente un escandalo den gobierno pa desvia atencion for di e escandalonan di corupcion di AVP mes. Tambe nan kier desvia atencion for di e locura di pone e yiu di Benny Sevinger como su marioneta riba lista di AVP. Nan ta deshonesto y nan no tin ningun interes pa combati corupcion cu mayan por enrikece e friends & family di AVP. P’esey nan no ta papia di corupcion como un problema serio y structural cu solamente por wordo mitiga den un manera structural. E gobierno actual, cu sosten di Hulanda, a tuma paso importante den e area aki durante e ultimo añanan. Naturalmente, e trabou ta leu di ta cla. P’esey e pregunta crucial ta: ken ta mas capacita pa sigui y termina e bon trabou aki? Mike Eman ta bay elemina corupcion cu su politica di avestruz y cu e aplauso di e duo comico di Enfoke? Of, ta e AVP di Mike mes ta e peliger mas grandi pa nos democracia y nos estado di derecho?
