Nos ta scucha, tende y mira, con den cierto paisnan frontera ta wordo sera pa hende no drenta cu Bijbel, pa hende por tene servicio, con iglesia ta wordo kima y misa ta wordo destrui, con pastornan ta wordo mata, di forma hopi cruel.
Awel e enemigo ( e diabel) sa cu su tempo ta serca, pesey e ta lanta gobiernonan contra e palabra di Dios. E ta lanta organisacionnan anticristo, caminda e palabra di Dios ta wordo rechasa tur momento.
Pero tur esaki ta tempo perdi pasobra e amor di Dios, ta mas grandi cu cualkier hende of hendenan cu ta pensa cu nan por stroba Dios.
Pa cuminsa Dios ta Spirito y no tin nada cu por detene, Dios ta donjo di tur cos, mas su palabra wordo persigi mas e palabra crece den curason di hende.
E malbadonan por kita Bijbel, kima Bijbel, y haci hopi cos mas keriendo den nan mes forsa y poder, pero e palabra di Dios ta bisa lo siguiente: Pasobra Dios a stima mundo asina tanto cu e a duna Su Yiu unigenito pa ken cu kere den dj’E no bay perdi ma tin bida eterna.
No tin frontera na mundo cu por sera pa e amor di Dios, pasobra e amor di Dios ta surpasa tur frontera, si un hende den e pais ey djis kere den Cristo Hesus e lo ta salba, pasobra no tin nada, pa detene e amor di Dios.
Dios ta stima tur hende y no kier pa ningun bay perdi,pesey E a manda su Yiu pa muri na crus pa nos tur pa nos salbacion. Pa salbacion di henter mundo, pa salbacion di tur esnan cu ta kere den dj’E.
Ta un Dios so tin y un mediador cual ta Hesus Cristo, y Su amor ta inmensamente grandi pa nos tur y Su gracia ta alcansa henter mundo.
Ma Dios a demostra Su amor pa nos den esaki,cu tempo nos tabata pecador ainda,Cristo a muri,pa nos.( Romanonan 5:8).
Esun cu tin mi mandamentonan y ta warda nan esey ta esun cu ta stima Mi,y esun cu ta stima Mi ta wordo stima door di Mi Tata y Ami lo stime y lo manifesta Mi mes na dje.( Juan 14:21).
Ma esun cu warda Su palabra, den dje e amor di Dios ta wordo perfeciona berdaderamente. Pa medio di esaki,nos ta den dj’E. Esun cu bisa cu e ta permanece den dj’E mester cana na mesun manera cu E a cana. ( 1 Juan 2:5-6).
Esun cu no ta stima no conoce Dios, pasobra Dios ta amor.( 1 Juan 4:8).
Ta tempo pa tur hende reconoce ken Dios ta den nan bida, y e motibo pa cual nan ta biba ta pa agrada Dios y cumpli cu e boluntad di Dios den nan bida, pasobra e ola di scuridad kier purba tapa hopi hende, pero e nubia di amor di Dios, ta mucho mas grandi y fuerte.
Cuanto hende no ta laga pa mayan locual nan por haci awe, si awe bo a scucha of lesa e palabra di Dios, no haci bo curason duro, pero entrega bo bida awe, pasobra mayan no ta priminti na ningun hende.
Nos ta bibando den un tempo hopi critico y trabahoso, caminda amor di hopi ta friando, caminda hende ta rechasa Dios, pa entrega nan mes na mentira di mundo, caminda hopi no kier tende e berdad.
Nos oracion mester aumenta tur dia mas y mas.
Pasobra awor e binida di nos Senjor ta mas serca.
Sinceramente, Pastor Marcel Balootje
