Ken cu confesa cu Hesus ta e Yiu di Dios,Dios ta permanece den dje, y e den Dios. Y nos a conoce y a kere e amor cu Dios tin pa nos.
Dios ta amor, y esun cu ta permanece den amor,ta permanece den Dios y Dios ta permanece den dje.
( 1 Juan 4:15-16).
Dios a stima nos y E a manda Su yiu unigenito pa nos por biba pa medio di dj’E.
Actualmente nos ta mira con actuacion di hende a cambia, pero tur esaki ta para scirbi den e palabra di Dios, cu nos lo drenta tempo trabahoso, caminda hende lo ta mas interesa den material cu den Dios.
Tambe ta para scirbi cu amor di hopi lo fria, cu hende lo bende hende, hende lo traiciona otro, e amor y respet ta den decadencia, matrimonio ta pasa den scual, famia ta dividi, tur esaki ta indica nos cu e binida di nos Senjor ta serca.
Hende ta tuma cierto autoridad riba mundo manera nan mes ta kere cu nan ta Dios, nan ta mata otro, nan persigi otro, nan ta bringa pa tera y dominio riba tera, y no ta corda cu e tera aki ta di Dios.
E actitud di inmoralidad ta wordo celebra, enbes di wordo rechasa, pica ta wordo aplaudi, impuresa ta wordo aprecia. Violencia bira un custumber, y hende ya no tin temor di Dios.
E amor di Dios ta eterno. E amor di Dios ta santo y infinito. Dios di berdad ta stima nos, y no laga nos lubida cu Dios kier nos bon, y cu E a priminti di no laga nos bandona, tampoco laga nos desampara.
Hopi hende ta simpatisa cu negativismo, cu amargura, nan a perde tur control, y ta hibando un bida di pleito constant, y ta lubida cu Dios a bisa pa stima Dios riba tur cos y bo prohimo manera bo mes.
E nivel di rebeldia cu a aumenta bao di nos hubentud ta alarmante, tin un pensamento cu esun cu falta respet pa su mayor y pa autoridad, ta algo masha bunita.
Un mandamento nobo Mi ta duna boso,pa boso stima otro, Y mescos cu Ami a stima boso,pa boso tambe stima otro. Na esaki tur hende lo sa cu boso ta mi disipel, si boso tin amor un pa otro.( Juan 13:34-35).
Y esaki ta e mensahe cu nos a tende di dj’E y ta anuncia na boso, cu Dios ta lus y den dj’E no tin nada nada di scuridad.
Tuma nota cu scuridad kier domina mundo, pasobra tur caminda cu tin odio y rencor y falta di pordon ta un indicacion fuerte cu scuridad ta domina.
Scuridad no conoce ni pober , ni rico, tampoco bobo of sabi, hasta den hende nan sinta den posicion halto como lider y mandatario mundialmente, nos por nota e presencia di scuridad. y e spirito di scuridad ta ataca tur caminda y solamente por wordo resisti pa medio di e amor di Dios.
Caminda e presencia di Dios ta scuridad tin cu bay, pesey nos mester busca e presencia di Dios den nos bida pa medio di oracion, y lesamento di e palabra di Dios.
Pasobra mi ta convensi cu ni morto, ni bida,ni angelnan, ni principadonan, ni cosnan presente,ni cosnan futuro,ni podernan, ni haltura,ni profundidad, ni ningun cos crea, lo por separa nos for di e amor di Dios cu ta den Cristo Hesus nos Senjor.
Cristo Hesus a demostra Su amor pa henter humanidad.
Laga nos stima otro manera Cristo a stima nos.
Sinceramente, Pastor Marcel Balootje
