E amor di Dios t’asina bunita y no tin nada pa iguala cu e amor di Dios.
Dios ta stima tur hende.
Dios ta bendiciona tur hende.
Dios ta disciplina tur hende.
Dios ta coregi tur hende y e cos di mas dushi ta cu tur hende ta bonbini cerca Dios.
Y Dios no kier pa ningun hende bay perdi, pero pa tur yega na conocemento di e berdad.
E amor di Dios ta trece crecemento, sanacion, liberacion, e amor di Dios ta constante, e amor di Dios ta firme, e amor di Dios ta fiel, no tin nada mas grandi, mas halto, mas hancho cu e amor di Dios. No tin nada cu por separa nos for di e amor di Dios. Si un hende tin mester di amor, awel bati na porta di Dios y bo ta haya amor na abundancia. Cerca Dios lo bo conoce loke ta amor berdadero.
Amor tin pasenshi, amor ta cariñoso y no ta jaloers. Amor no ta gaba y no ta arogante. E no ta comporta su mes indecente, e no ta busca su propio interes, e no ta wordo provoca, e no ta warda rencor, e no ta regosiha den inhusticia, ma ta regosiha den e berdad. Tur cos e ta tapa, tur cos e ta kere, tur cos e ta spera, tur cos e ta soporta (1 Corintionan 13:4-7).
Si nos wak bon locual e palabra di Dios ta bisa kico ta amor, anto nos lo ripara cu tin hopi cos cu hende ta yama amor awendia, cu no tin nada di amor den dje.
Ora bo ta stima un hende, bo no ta ofende e persona, bo no lastima e persona ni verbal ni fisicamente, bo no lastra su nomber, bo no ta kibra e persona, ta dificil bisa como homber cu bo ta stima un muhe y bo ta bati e muhe, ta dificil bisa bo ta stima bo esposa, pero toch bo tin mas muhe den bo bida. Esun cu ta stima su famia, no ta perhudica, ni tampoco traiciona su famia, ma e ta zorg p’e ta un bendicion pa su famia.
Mira ki un amor grandi e Tata a duna nos cu nos por wordo yama yiunan di Dios y esey nos ta. P’esey e mundo no conoce nos, pasobra e no a conoc’E (1 Juan 3:1).
Den amor El a predestina nos pa wordo adopta. Como Su yiunan pa medio di Hesucristo, segun e bon intencion di Su boluntad (Efesionan 1:5).
Den dj’E nos tin redencion pa medio di Su sanger, e pordon di nos pica, segun e rikesa di Su gracia (Efesionan 1:7).
Ta cosnan grandi Dios a haci den nos bida. Ta un previlegio pa entrega nos bida na Cristo Hesus y biba den e boluntad di Dios, wardando ansiosamente e binida di nos Señor Cristo Hesus, cu pronto lo bin busca Su pueblo.
Dios a demostra Su mes amor pa cu nos den esaki, cu tempo nos tabata pecador ainda Cristo a muri pa nos. Mucho mas siendo hustifica awo pa medio di Su sanger, nos lo ta salba for di e furia di Dios door di dj’E (Romanonan 5:8-9).romano
Pasobra di tempo nos tabata enemigo, nos a wordo reconcilia cu Dios door di morto di Su Yiu. Cuanto mas, siendo reconcilia, nos lo ta salba pa medio di Su bida (Romanonan 5:10).
Pasobra e amor di Cristo ta obliga nos, yegando n’e conclusion aki cu un a muri pa tur. P’esey tur a muri y El a muri pa tur, pa esnan cu ta biba no biba pa nan mes, ma pa esun cu a muri y cu a resucita pa nan motibo (2 Corintionan 5: 14-15).
Sinceramente, Pastoor Marcel Balootje
