Mescos cu un mucha chikito cu ta yora pidi lechi ora e tin hamber, asina e ausencia di Dios ta wordo nota den bida di hende.
Placa no por reeemplasa e presencia di Dios.
Paranda no por reemplasa e presencia di Dios.
E ausencia di Dios ta wordo sinti y mira den palabra cu ta sali for di boca di hende.
Tur momento nan kier tuma decision riba nan mes y hopi biaha e decision ey ta hiba nan mas leu for di Dios.
Keto bay nan ta biba den pasado, nan no kier pordona, nan ta pleita pa placa y cosnan material.
Nan ta casa pero kier hiba un bida di soltero, pa motibo di e ausencia di Dios den nan bida.
Mayornan cu no ta pone tempo pa nan yuinan, y ta laga nan biba con cu ta, tin falta di Dios den nan bida.
Hende cu henter dia ta murmura y ta discuti, y ta sconde cos y biba un bida di sconde cos y falsedad, tin mester di Dios den nan bida.
Tur hende cu rechasa e plan di salbacion, lo biba sin Dios y lo sufri e consecuencia den stress y depresion, y na final lo ta perdi.
Cristo Hesus a bisa, Ami ta e mata di wijndruif , pega na Mi boso por tur cos, leu for di Mi boso no ta logra nada.
Purba hiba un bida matrimonial sin Dios, ta envano, bo ta ganja bo mes.
Purba lanta bo yuinan sin Dios, bo ta comete dobbel enganjo, prome contra bo mes y di dos contra bo yuinan,
Esun cu ta purba bay contra Dios, ta bay contra su mes, pasobra nunca un hende por gana Dios.
Tur hende ta vulnerabel pa tentacion, pero ora nos kier biba sin Dios nos mes ta busa problema pa nos curpa.
Aunke con sabi un hende ta, aunke con halto su posicion ta den comunidad, e ausencia Dios ta keda nota den su palabra, actitud, y hasta den su forma di biba.
Sin Dios nos bida ta sunu, sin direccion, sin protecion, completamente habri, caminda e enemigo ta drenta y fiesta, mental, fisicamente y spiritualmente.
Ausencia di Dios ta pone hende sconde cos, no kier papia, ta tuma decision pober riba nan mes,y e enemigo ta probecha di e situacion, treciendo tur sorto di fabula den nan cabes.
Ausencia di Dios den bida di hende ta habri porta pa idolatria y buheria, y creencia diabolico.
E palabra di Dios ta sinja nos pa; Cu tur humildad,y suavidad, cu pasenshi, soportando un y otro den amor. Siendo diligente pa preserva e unidad di e Spirito den e vinculo di pas.( Efesionan 4:2-3).
Ausencia di Dios, no ta nifica tur momento cu hende no tin Cristo den nan bida, pero hopi biaha ta manifesta su mes ora hende aparta for di Dios, pa asina nan kier tuma nan mes decision sin Dios.
Senjor ta cu boso,ora boso ta cun’E, y si boso busk’E, E lo laga boso hanje, ma si boso bandon’E , E lo bandona boso.( 2 Cronicanan 15:2).
Ta hopi rol ta wordo hunga awendia, ora e amor pa placa ta mas grandi cu e amor pa Dios, ora nos tin placa, nos ta shop tur caminda, ora nos no tin placa, nos ta pleita, rabia, y ofende otro,eynan e ausencia di Dios ta wordo nota cu tur claridad den nos bida.
Buska Senjor mientras cu E por wordo hanja,yam’E mientras cu e ta serca.( Isaias 55: 6).
Cristo Hesus ta nos unico Salbador.
Sinceramente, Pastor Marcel Balootje
