Awendia ora bo papia di fieldad Matrimonial , e ta zona straño pa hopi hende, pasobra hopi no tin temor y a bandona nan compromiso cu Dios.
Pero di berdad tin homber y muhernan fiel den nan Matrimonio cu ta respeta e autoridad di Dios den nan bida..
Ora tin fieldad den matrimonio, tin respet pa e yiunan, hende infiel no ta respeta Dios , ni nan mes, ni tampoco nan yiunan, pasobra yiunan ta prome cu ta wordo afecta, spiritual y social door di infieldad.
Ta dificil pa un hende ta fiel na Dios y infiel na su esposa (o) una vez un persona ta infiel, e ta perde su integridad , un personal infiel ta spiritualmente morto, su contacto cu Dios ta kibra.
Ora un hende comete un infraccion den trafico, e ta bisto , y bo ta haña verbal di polis, pero ora hende ta infiel, nan ta haña un spirito di cabesura, cu ta haci nan defensivo den nan maldad.
Un homber of muher infiel a perde sinceridad dilanti Dios, y a keda proba cu despues cu infieldad drenta den bo bida, bo nivel di respet pa tur otro cos ta bira menos.
Bo por bisti bunita, papia bunita, y bo amistadnan por ta elogiabo, bo capacidad economico por ta grandi, bo ta bon studia, pero bo infieldad matrimonial dilanti di Dios, ta cambia e panorama di bo bida.
Bo yiunan ta cuminsa ripara cu bo amor a disminui, aunke cuanto bo purba disimula, bo por hiba nan fastfood restaurant tur dia, order pizza pa cas, cumpra tur sorto di regalo, viaha 5 biaha pa aña pero toch nada di esey no ta recompensa bo fieldad.
HEBREONAN CAPITULO 13 VERS 4 TA BISA: Laga Matrimonio wordo honra pa tur hende,y laga e cama Matrimonial ta sin mancha, pasobra Dios lo huzga Fornicador y Adulteronan.
Awendia den mayoria aplicacion pa empleo nan ta screen hende, y e screening ta drenta den bo bida, pero hopi empresario of dunado di trabao no ta considera e bida matrimonial como un pilar di seriedad den bida di nan empleado, y den hopi caso a resulta cu infieldad di un empleado a haci danjo na su mes y na su trabao.
Infieldad ta base di violencia domestico,causando hopi dolor y hasta morto, y ta contribui tur dia na Crisis Social.
Pero laga tur homber y muher cu ta infiel screen nan mes consenshi, y wak si tin balor pa biba un bida, aparta for di Dios,y arepenti y bolbe bek serca Dios.
E situacion ta alarmante, pasobra infieldad ta cambia comportacion di bo yiunan . pasobra e spirito di rebeldia,mentira y desobedencia ta drenta bo hogar.
Pero como hende ora bo arepenti, e situacion lo cambia y paz lo regresa den bo cas.
Dios ta pordona infieldad , no keda pega den e trampa di diabel.(Juan Capitulo 8 vers 1-11)
Laga nos haci oracion pa tur matrimonio riba nos isla, pa fieldad por reina den tur hogar.
Sinceramente,
Pastor Marcel Balootje.
