Bida ta ofrece hopi cos bunita, pero nos mester tin pasenshi, pa nos por ricibi, hopi hende ta kere awendia, cu locual cu nan mester , mester yega na e ora cu nan kier, nan ta biba un bida digital, pensando cu tur cos bo ta primi un konopi y bo ta hañe, caba di berdad no ta asina.
Mester tin pasenshi pa bay scol, y pasenshi pa caba di studia, mester tin pasenshi den trafico, pasenshi na cas, pasenshi den matrimonio, y pasenshi cu famia, mester tin pasenshi pa recupera di un malesa, mester tin pasenshi na trabao, y hopi ta lubida cu nan mester tene pasenshi cu nan mes. Pasobra Dios ta purba nos pasenshi, pa asina mira e nivel di confiansa cu nos tin den Dios, pa mira e milagro sosode den nos bida.
Sin pasenshi nos no por alcansa e yamada di Dios pa nos bida, pasobra ora E yama nos , nos tin cu warda riba dj’E prome cu nos haci algo, pasobra tur yamada ta pa sirbi, y pa un hende sirbi Dios e mester tin pasenshi.
Asina manera esnan cu a wordo scohi di Dios, santo y stima, bisti un curason di compasion,cariño,humildad,mansedumbre y pasenshi.( Colosensenan 3:12).
Ma si nos spera riba loke nos no ta mira, e ora ey cu perserverancia, nos ta spera cu gran antisipacion riba dje.( Romanonan 8:25).
Pesey ami prisonero di Señor, ta roga boso, pa cana na un manera digno, di e yamada cu cual boso a wordo yama, cu tur humildad y suavidad, cu pasenshi , soportando un y otro den amor.
Ora un hende ta bisa na bos halto cu e no tin pasenshi, e ta bini door di falta di conecemento di Dios, pasobra pasenshi ta un fruta di Spirito Santo, y pasenshi den nos bida, ta un mustra cu nos no ta riba nos mes, pero cu e Spirito di Dios ta guia nos bida.
E enemigo ta gusta hunga cu nos pasenshi, pa asina nos tuma decision riba nos mes y asina sali for di boluntad di Dios, demostrando falta di Fe y confiansa den Dios.
Ana den 1Samuel mester a demostra pasenshi y perserverancia te na momento cu Dios a contesta, haciendo un matris infertil bira fertil pa honor y Gloria di Dios.
Hopi ta cay den e trampa di inmoralidad, pasobra nan no tin pasenshi, hopi hende ta papia cosnan robes, confia den hende robes, drenta relacion robes, pa falta di pasenshi.
Por ehempel ora un persona keda vuido of vuida, y e ta jong e mester tin pasenshi, pa no corre drenta cu cualkier persona, djis pasobra e mester di un compaño den su bida, ni tampoco laga su emocionnan domina su bida, pero mester tin pasenshi pa pidi Dios, y pasenshi pa warda riba Dios, pasobra awendia no ta tur hende bo por hisa hinca den bo cas y bo famia.
Tene cuanta cu esaki” Ma fruta di Spirito Santo ta : amor,goso,pas,pasenshi,cariño,bondad,fieldad,mansedumbre,dominio propio,contra e cosnan ey no tin ley.
Den Salmo 40:1-3 David ta bisa: Mi a spera cu pasenshi riba Señor y E a inclina Su mes na mi y a scucha mi sclamacion.
E a sacami for di e pos di destruccion, for di e lodo di klei. E a pone mi pia riba un baranca,y a haci mi pasonan firme. E a pone un cantica nobo den mi boca, un cantica di alabansa na nos Dios, hopi lo mira esaki y teme y lo confia den Señor.
Pasenshi ta permiti nos mira e Gloria di Dios den nos bida,
Sinceramente, Pastor Marcel Balootje.
