(Remetido ricibi di tercera)
Ultimo dianan por a tuma nota di un circo mediatico rond di Colegio Arubano. For di Curaçao obispo a manda pastoor Meris, cu hunto cu pastoor Andres di Savaneta a papia ku casi henter Aruba y gobierno, den persona di minister di enseñanza Sr. Endy Croes, a dedica henter un dia na SVOA, reuniendo cu e dos pastoornan, rectorado y docentenan. Locual ta poco stranjo, pasobra SVOA ta un stichting den cua gobierno no tin ningun partisipashon. Pero na Aruba nos sa e mal costumber di nos politiconan cu kier mete den tur cos na unda nan ta kere cu por saca algun probecho. E pregunta e ora ta: ki benefisio gobierno o minister tin den mete su mes den un problema cu e no tin parte ni arte den dje.
E directiva actual a sinta na augustus 2020. E directiva aki a cuminsa haci loke tur directiva ta supose di hasi: controla!
E prome iregularidad cu, riba indicashon di rector Tim Croes, a encontra tabata e hecho cu un grupo di docentenan di Colegio Arubano tabata traha anochi pa Avond HAVO. Como cu e salarionan di e docentenan ta subsidia pa gobierno, LMA ta aplicable y LMA ta prohibi “nevenactiviteiten” sin permiso di bevoegd gezag.
Esaki pa garantiza cu e trabao cu ta wordo hasi manera debe ser, especialmente den enseñanza. Esaki ta hopi importante. Directiva a coregi e situashon aki y pa e motivo ey e docentenan a bai den un protesta publico na juli/augustus 2021. Supuestamente pasobra nan no a gusta e tono di e carta firma dor di presidente di bestuur. Cualkier hende lo comprende cu e motibo real pa busca publicidad ta e hecho cu nan salario tabata na peligro, pasobra directiva correctamente a coregi e situashon iregular aki.
Mester ta mas cu logico cu un Directiva drechi no por a permiti di laga continua un situashon iregular na unda docentenan, cu banda di e oranan cu nan ta duna les tambe ta wordo paga pa oranan cu nan prepara lesnan, controla huiswerk y atende reunionan, ta usa parti di e oranan aki pa duna les otro camanida. Logicamente si nan ta bai traha e tempo ey na Avond Havo e lo afecta e calidad di enseñanza pa e studiantenan na Colegio.
Docentenan mester sa cu esaki no por tuma lugar sin e permiso cu ley ta exigi pa cualquier ambtenaar of gelijkgestelde cu ta wordo paga dor di gobierno. Un interesante detaye ta y locual hopi hende te awe no sa, ta cu e rector actual, Sr. Tim Croes, manera menshona, ta esun cu a pone esaki bou atenshon di directiva, mas e a skirbi e carta cu despues e presidente di directiva a firma y a bai pa docentenan.
Part 2 lo continua…..
