Laga nos tira un bista rond di nos , y mira cuanto maldad ta tumando lugar, wak con hende ta planea maldad contra otro.
Wak con hende ta biba malo cu otro, hende ta haci malo cu otro, traha trampa pa otro cay aden.
Faltamemto di respet a bira algo normal, papiamento di malo riba otro a bira custumber,
Pensamento malo a bira tradicion, practica di maldad ta algo diario, tin biaha hasta bo por hole e maldad den aire.
Ta parece manera locual ta para scirbi den Genesis 6: 5 ta ripiti : E ora ey Senjor a mira cu maldad di hende tabata grandi riba tera, y cu tur intencion di e pensamento di su curason tabata continuamente maldad so.
Den hopi pais riba e mundo aki politica a bira maldad, hende ta haci maldad sconde tras di politica,haci gera y sconde tras di politica.
Laga hende pasa hamber y sconde tras di politica, hinca pais den hamber y pobresa y sconde e asunto den politica culpando otronan di nan error.
No ta nada desconoci cu nos bisa cu e diabel ta un mentiroso, y cu e a bini solamenta pa horta ,pa mata y pa destrui, pero ta parce manera esaki ta drenta di un horea y sali na otro.
Hende ta apoya maldad, consenti cu maldad, pone maldad nan dilanti, carga maldad den scalchi , y hasta broma cu nan maldad.
Bo ta kere cu un tata cu no ta criando su yuinan, no sa cu ta maldad e ta haci?
Bo ta kere cu un pareha den adulterio no sa cu ta maldad e ta haci?
Bo ta kere cu esnan cu ta practica bruheria y idolatria no sa cu ta maldad nan ta haci?
Bo ta kere cu hacidornan di redo no sa cu ta malo nan ta haci?
Bo ta kere cu bendedo di droga no sa cu ta malo e ta haci?
Bo ta kere cu un abusador y violado di mucha no sa cu ta malo e ta haci?
Bo ta kere cu un hende cu ta corre auto burachi y causa accidente grave no sa cu ta malo e ta haci?
Bo ta kere cu un persona cu ta cana cu cualkier tipo di arma no sa cu ta malo e ta haci?
Bo ta kere cu e ladron no sa cu ta malo e ta haci?
Bo ta kere cu esun cu ta ganja pueblo no sa cu ta malo e ta haci?
Y asina nos por sigi bay y nos por mira cla con maldad ta domina hende, y te ainda tin hende kier persisiti den nan maldad
Ta hopi cos tin ta sosode caminda hende ta busca apoyo di ley pa sconde nan maldad, caba den bista di Dios e cosnan ey ta maldad, tristesa, inmoralidad.cos cu Dios ta bisa pa aleha di dje y cu Dios a adverti mundo completo cu esnan cu ta practica cosnan asina lo no hereda e reino di Dios.(Galationan 5:19-21) (1Corintionan 6:9-10) ( Romanonan 1 :18-32).
Hende ta scohe pa haci maldad bao di influencia diabolico, enbes di busca Dios den tur su bondad.
Y Hesus a puntre : Pakico bo ta yama Mi bon? Ni un hende no ta bon sino Dios so.( Marco 10:18).
No sea ganja mi rumannan,stima. Tur bon regalo, y tur don perfecto ta for di ariba, y ta baha bin for di e Tata di lusnan,serca Kende no tin variacion ni sombra di cambio. ( Santiago 1:16-17).
Dios ta lus y den dj’E no tin nada, nada di scuridad.(1 Juan 1:5).
Sinceramente, Pastor Marcel Balootje
