E direccion den cual mundo ta bayendo, ta parce manera hopi hende a lubida, riba e bondad di Dios, y cu Dios ta lus y den dje no tin nada nada di scuridad.
Cada biaha cu un hende ta participa den un actividad di scuridad, maldad, inmoralidad y abominacion, hopi di nan no ta conciente,di e bondad di Dios pa nan bida.
Pesey nos como mayor, mester hala atencion di nos yuinan, presentando nan e evangelio di Dios, na nos yuinan for di tempran pa nan conoce e bondad di Dios for di chikito, y na grandi nan no aparta for di dje.
Pasobra muchanan, cu ta cana cu arma, bende droga, cu pensamentonan malo, mester conoce e bondad di Dios, pasobra bondad di Dios ta amor di Dios, y bondad di Dios a wordo ofrece na nos tur den Juan 3;16.
Den prome Corintionan 15:33 ta para scirbi: No laga hende gaña boso: Mal compania ta daña bon custumber. Husa boso sano huicio manera mester ta y stop di haci pica,pasobra algun no tin conocemento di Dios.
Ora un hende tin conocemento di Dios, e ta bin compronde cu tur locual un hende haci , un dia lo sali na cla,y cu nada no ta scondi pa Dios, y cu ora hende tin pica scondi den su bida, ta e mes e ta gaña pasobra esun cu ta sconde su pica lo no prospera ( Proverbionan 28:13).
Palabra di Dios ta bisa cu no tin ningun hende bon riba e mundo aki, cu solamente Dios ta bon, pero ora nos reconoce, arepenti,y aparta di pica , nos lo conoce e bondad y e misericordia di Dios, pa nos bida y di mes pa henter nos hogar,pasobra bendicion di Dios mester corre di mayor pa yiu.
No laga malo vence bo, ma mas bien vence malo cu bon.( Romanonan 12:21).
Dios kier pa nos tur recorda locual ta para scirbi den Romanonan 12:2: No sea conforme na e mundo aki, ma sea transforma pa medio di e renobamento di boso mente,pa boso por comproba kico ta e bon y agradabel, y perfecto bpluntad di Dios.
Sin ningun clase di exepcion, nos tin cu tene na cuenta cu maldad no ta bini di Dios, pa nos no particpa den ningun clase di obra di maldad, pasobra maldad ta disfrasa hopi biaha y bini manera den un papel di regalo, mustrando bunita, pero su tras tin un veneno mortal, tanto fisico, mental of spiritual. Maldad no ta respeta hende rico ni pober no lubida locual ta para scirbi den Juan 10:10.
No sea gaña rumannan stima. Tur bon regalo y tur don perfecto,ta for di ariba, y ta baha bin for di e Tata di lusnan, cerca Kende no tin variacion ni sombra di cambio.( Santiago 1:16-17).
Ki grandi ta Bo bondad, cu Bo a warda pa esnan cu tin temor di Bo, cu Bo a prepara pa esnan cu ta tuma refugio den Bo, den presencia, di e yuinan di hende. Bo ta sconde den e lugar secreto di presencia.( Salmo 31:19-20).
Ora un hende ta busca e bondad di Dios, Dios mes lo sconde e persona for di maldad, pa maldad no alcansa bo.
Dios nunca lo manda hende haci locual no ta boluntad di Dios, tur locual ta bon ta cana den boluntad di Dios. Y tur hende mester ta na altura locual ta e boluntad di Dios , pa nos tene cuenta locual ta para scirbi den Filipensenan 4:8-9 y Thesalonisensenan 4:3-8.
Señor ta bon, un luga fortifica den e dia di angustia.(Nahum 1:7).
Sinceramente Pastor Marcel Balootje
