Genesis 6:22 ta para scirbi: Asina Noe a haci : conforme tur loke Dios a ordene , e a haci.
Genesis 7 : 5 ta para scirbi : Noe a haci conforme tur loke Señor a ordene.
Kico lo a pasa si Noe no a obedece e palabra di Dios?
Kico lo a pasa si e no a construi e Arca manera Dios a ordene y Dios mes a manda tur e animalnan den e Arca pa asina e diluvio no a destrui nan?
Kico lo a para di Noe y su propio Famia?
Obedencia ta nifica, scucha e palabra di Dios, y haci locual Dios ta bisa.
Obedencia ta nifica pa tur mucha, scucha locual nan mayor ta bisa, y haci tur locual cu ta bon cu nan mayor ta bisa.
Si Noe no tabata obediente awe mundo lo tabata diferente.
Mescos tambe ora nos no ta obediente na e palabra di Dios, nos bida lo no agrada Dios.
Noe a haña gracia den bista di Señor, y Señor a usa Noe.
Noe a predica 120 aña mientras e tabata construi e Arca segun e midi y diseño cu Dios a dune, pero notable ta cu tur e hendenan cu tabata tey, mayoria no a scuche,pasobra nan a bisa cu e tabata loco y tabata haci bofon di dje.
Y ora e diluvio a cuminsa ta solamente Noe y su yiu hombernan, su esposa y esposa di su yiu hombernan a drenta e Arca y Señor a sera e porta.( Genesis 7:15).
Kico tabata e motibo pa cual Señor a manda e diluvio?
E poblacion a crece y tabata rebelde contra Dios .( Genesis 6:1).
Perversion sexual (Genesis 6:2).
Actividad di Demoño ( Genesis 6:2).
Corupcion y Violencia tur caminda . ( Genesis 6:4)
Maldad y mal pensamento tabata domina mente di hende constant .( Genesis 6:5).
Den lucas 1;26-38 e Angel di Señor a bishita Maria, y a bisa Maria locual Dios ta bay haci den su bida. Wak bon locual ta scirbi cu Maria a haña gracia serca Dios ( Lucas 1:30). Y den Lucas 1:38 Maria ta bisa : Ata e sirbido di Señor laga sosode cu mi segun bo palabra nan. Y e Angel a kita bay lage.
Laga nos tene na cuenta e obedencia cu den e caso aki ta resalta y pa e motibo ey mundo a conoce su Salbador.
Y awe e palabra di Dios ta bisa : Pasobra Dios a stima mundo asina tanto cu e a duna su Yiu unigenito pa ken cu kere den dj’E no bay perdi ma tin bida eterna. Esun cu kere lo ta salba , ma esun cu no ta kere lo ta condena caba pasobra e no a kere den e Yiu unigenito di Dios.( Juan 3:16-18).
Tambe e palabra di Dios ta bolbe recorda nos: Esun cu kere den e Yiu tin bida eterno,ma esun cu no obedece E Yiu lo no mira bida, ma e furia di Dios lo keda riba dje.( Juan 3:36).
Ta para scirbi cu e dia y e ora di e binida di Cristo Hesus ningun hende no sa, Pasobra e binida di e Yiu di Hende lo ta mescos cu den e dianan di Noe.( Mateo 24:37).
Djis tira un bista mundialmente cuanto hende ta ninga Dios, ta biba manera na kier, sin ningun clase di temor pa Dios, haciendo bofon,maldad.
Pero te ainda obedencia ta bibo meymey di esnan cu ta stima Dios, pasobra solamente esnan cu ta obediente na Su palabra lo mira Su cara. ( Hebreonan 12:14).
Cristo Hesus ta nos Salbador.
Sinceramente, Pastor Marcel Balootje.
