Durante e Conferencia di Prensa di Gobierno di Aruba dia 31 di juli, a trata dos punto importante. Un punto a trata di e atakenan di oposicion riba Ministerio Publico y e otro e reciente Eleccion Presidencial na Venezuela. Despues di e elaboracion di e dos puntonan, Prome Minister Evelyn Wever-Croes a responde varios pregunta di miembronan di prensa.
Un miembro di prensa a insisti riba e comparacion di e eleccion di Venezuela cu e eleccion di Aruba na aña 2021. Aki e miembro di prensa a cuestiona si Gobierno di Aruba tin pensa di haci cierto ahustenan pa e siguiente eleccion pa asina evita cu e miembro di prensa en cuestion por haya un percepcion eroneo riba e tema aki. Riba esaki Prome Minister a duna di conoce cu Gobierno a haci tur e cambionan cu mester haci pa e siguiente eleccion, y tur cos ta prepara caba pa e siguiente eleccion na Aruba. Manera ta conoci, e cambio di e kiesverordering a pasa Parlamento, y tur cos ta cla pa e siguiente eleccion.
Ademas, Eleccion 2021, esnan cu no tabata di acuerdo cu e resultado a alega cu na cierto urnanan, nan famianan a priminti di vota pa nan, pero toch nan no a haya voto eynan. Partido AVP a hasta bay Corte y Corte a dicta cu tur cos a bay segun regla. Pues nos tin suficiente checks and balances den nos sistema electoral. Esun cu kier compara eleccion na Aruba di 2021 y eleccion na Venezuela di siman pasa, no por ta serio!
“Nos a haci e cambionan cu mester a wordo haci. E sistema di nos votacion na Aruba ta un sistema cu no tin duda. Leu a leu tin politiconan cu ora nan perde, nan kier crea duda riba dje. Otro biaha nan gana nan ta keda keto riba cosnan y esey ta mustra cu nan no ta serio”, Prome Minister a remarca.
Prome Minister a enfatisa cu no por trece duda riba nos sistema electoral pasobra nos tin un sistema hopi solido, un sistema cu ta wordo controla y monitorea. Nos CENSO por ehempel y nos reglamento, nos legislacion riba e tema di eleccion ta wordo alinea den Reino Hulandes y henter Reino ta para pa e calidad y transparencia den esaki, pues den esey no mester tin duda.
