E Compleho di Aruba Marriott ta Gradici nan Heroe nan Antonio Ras y Tisha Powell pa Salba Bida di un Huesped

Training, teamwork y balentia tabata e formula cu a yuda salba bida di un huesped riba diamars 23 di maart 2022 anochi, unda cu un huesped a haya un infarto y no tabata tin pulso. Dos asociado di e departamento di Loss Prevention di Aruba Marriott Resort a reacciona inmediatamente pa yuda salba bida di e huesped aki, mientras cu ambulance tabata na caminda pa e hotel.

Rond di 23:58 riba 23 di maart 2022, e oficina di seguridad a haya un yamada di emergencia pa un huesped cu tabata den camber sin pulso. Inmediatamente dos asociado di Loss Prevention, Antonio Ras – Loss Prevention Supervisor y Tisha Powell – Loss Prevention Officer, a bay na e camber pa duna asistencia. A cuminsa di biaha cu CPR y mientras e huesped tabata ricibiendo CPR, a sigi e aviso di e ‘automated external defibrillator (AED)’ cual tabata pa duna shock na e huesped. Despues di a haya un pulso swak, a keda purba y despues di paar di antento, a logra haya un pulso mas fuerte, cual a wordo manteni mientras cu e ekipo di paramedico di ambulance a yega na e sitio pa tuma over y hiba e huesped hospital.

“Tur miembro di e ekipo di Loss Prevention tin training y certificacion den CPR, uso di e AED machine y otro procedura nan di emergencia y alaves ta practica esakinan regularmente pa asina ta prepara pa actua den un caso actual”, a comparti Ruthline Theysen – Complex Director of Human Resources, “Nos ta sumamemente orguyoso y agradecido na nos heroenan Antonio Ras y Tisha Powell, kendenan a actua di biaha, aplicando locual nan a siña cu hopi balentia y un teamwork fuerte. Un danki di curason di parti di gerencia y coleganan di e compleho di Aruba Marriott pa nan acto nan heroico cu sigur ta un inspiracion grandi di admira”.

E huesped a recupera y hunto cu su casa a duna un gradicimento personal na Antonio, Tisha y e ekipo di Aruba Marriott Resort cu hopi emocion y felisidad pa ta na bida y sumamente agradecido di a wordo duna un otro oportunidad pa biba.

E compleho di Aruba Marriott a nomina Antonio Ras y Tisha Powell pa un di e reconocimentonan di mas prestigioso di Marriott International, ‘The Chairman’s Award, cual ta honra asociado nan di Marriott rond di mundo pa a salba un bida.