Den honor di Pride month, e compleho di Aruba Marriott a organisa un sesion educativo y interactivo di ‘Pride Talk’ pa nan asociadonan den Aruba Marriott su Amsterdam Ballroom.
Oradornan special tabata Miguel Mansur, Erin Croes y Veer Alwani kendenan a wordo invita pa asina comparti nan experencianan personal di con nan a navega nan trayectoria como un persona LGBTQ+ dentro di nos comunidad, cual sigur a conmove y inspira cada un asociado presente. Endy Croes tabata invitado special como maestro di ceremonia y sigur tambe a comparti informacion valioso abase di su experencianan personal.
Marriott International ta promoviendo diversidad, igualdad y inclusion pa hopi tempo como parti di nan cultura di “We Put People First” y “We Serve Our World” y awo e compromiso ta mas fuerte cu nunca pa asina crea un medio ambiente inclusivo pa tur hende. Eventonan manera esaki ta celebra y mustra e apoyo na e comunidad di LGBTQ+ y alaves extende tur bishitantenan y asociadonan e comfortabilidad pa ta nan mes.
Esaki no ta un excepcion pa e compleho di Aruba Marriott. Como parti di Marriott International, Aruba Marriott ta pone prioridad na e luna di Pride pa asina crea conscientisacion y amplia e sosten na e comunidad di LGBTQ+. Adicionalmente, Aruba Marriott a ilumina e entrada di e hotel cu lusnan colorido representando e bandera di regenboog di Pride pa di cuater aña consecutivo, como tambe a organisa un evento special di Pride Night Brunch y a ofrece gelato decora cu colornan di e regenboog na Gelato & Co., pa asina amplifica e apoyo na e comunidad LGBTQ+.
