E compromiso di Gabinete AVP-Futuro, ta pa revitalisa nos barionan di manera structura y duradero pa tur hende por biba un bida digno. Diahuebs mainta, e ekipo di Accion di Bario, bao liderato di Prome Minister mr. Mike Eman, a drenta Pos Chikito Complex y hunto cu DOW, Serlimar, BCI, GKMB, FPNC y FCCA, a duna oido y asistencia na e habitantenan di e bario. Accion di Bario ta un oportunidad pa scucha e retonan di e bario pa por drecha e bario y mehora e bienestar di cada habitante y duna nan perspectiva pa futuro.
Prome Minister Eman, acompaña pa Minister mr. Wendrick Cicilia, habitante di Pos Chikito, a bishita e bario y percura pa un limpiesa completo den e casnan social.
Esaki ta momento pa conecta cu pueblo, caminda por haya e feedback y scucha e necesidad di e ciudadano. Mayoria di e casnan ta di FCCA caminda hopi di nos grandinan ta biba. Gran parti di esnan di menos recurso mester di ayudo social, cual a cuminsa caba despues di e aumento di 250 florin pa e pensionado.
Conhuntamente cu DOW y ploegnan di limpiesa a presenta y pone man na obra. Algun habitante a menciona cu nan tin casi ocho aña sin mira un accion manera esaki tuma luga. E falta di atencion pa Pos Chikito Complex a deteriora durante e ultimo 7 añanan, y awe a haya un aire fresco den e bario di Pos Chikito cu e Accion di Bario.
Habitantenan di e bario a expresa nan gratitud enorme pa e instancianan cu a compaña Prome Minister Eman y Minister Cicilia den e accion aki, y hasta a obsekia Prome Minister Eman algun mata como muestra di gratitud. Matanan cu mes momento a drenta tera y ta forma parti awo di e proyecto di reforestacion di nos pais.
