Diaranson den oranan di mainta un di e baronnan mas grandi di droga na hulanda, a wordo aresta na Aruba.
E conocido baron di droga Piet Wortel despues di un acion existoso a wordo deteni pa e team FastNL di Dienst Landelijke Recherche, asina e unidad policial aki a confirma.
Recientemente a yega un informacion cerca e team special aki, cu Piet Wortel, kende ta scondi pa anjanan largo na Surnam, lo bay tuma un buelo pa bay Aruba. Mesora e team a presenta un peticion pidiendo asistencia di husticia local pa haci detencion di e homber aki.
Diaranson na yegada na Aeropuerto Internacional Reina Beatrix, Piet Wortel a keda deteni na momento cu imigracion a controla su paspoort.
E ta actualmente cera na Aruba y ta wardando pa e wordo manda Hulanda pa caba di sinta su resto di castigo di prison.
Piet Wortel a nace na Alphen aan den Rijn, di mayornan Surnameo. E tabata wordo busca pa husticia pa motibo cu ainda e falta casi tres aña mas pa caba di sinta su castigo di prison, cu na maart 2014, e la wordo sentencia p’e. Piet Wortel a wordo sentencia cu 7 aña di castigo di prison, den un mega proces cu a dura 13 dia. E la wordo sentencia pa traficacion di droga y pa su participacion den un organisacion criminal.
Durante su verlof, Piet Wortel a huy for di Hulanda y a bay Surnam y asina no por a caba di sinta su castigo, e tin basta aña scondi na Surnam.
Ministerio Publico Hulandes a yame e lider indiscutibel di un organisacion di droga, cu pa hopi aña tabata tene nan mes ocupa cu traficacion di cocaina. Segun husticia Hulandes, e organisacion aki tabata wordo considera como un multinational pasobra e tabata opera rond mundo.
Piet Wortel a wordo aresta na 2012, na Barcelona, Spaña. Esaki a sosode despues di un wega di futbol entre Barcelona y AC Milan. Piet tabata hunto cu un amigo di dje den e Skybox luhoso, mirando e wega di futbol y na final di e wega di futbol, e la keda deteni despues cu e la bandona e stadion.
Piet Wortel a wordo entrega na Husticia Hulandes. E caso den cual e la wordo sentencia tabata yama Tidore. E investigacion tabata relaciona cu un transporte di 1100 kilo di cocaina cu a wordo intercepta. E cocaina tabata scondi den un cargamento di Whisky cu a drenta waf di Rotterdam.
Despues a bin sali na cla, varios otro traficacion di cocaina mas, for di Latino America pa Hong Kong, pa Cabo Verde y Hulanda. Den e investigacion autoridad a tap Wortel te hasta na momento cu e tabata sinta den su stul di avion.
Ministrio Publico a exigi 9 aña pa Wortel, pero na final e la haya 7 aña.
Siegfried ‘Piet’ Wortel tabata sa con pa infiltra y asina drenta den e kringnan mas halto di sociedad Hulandes. E criminal aki durante Campeonato Mundial di Futbol na 2010 na Zuid Afrika, e la yega te den contacto cu famia real Hulandes y te hasta a logra saca un potret banda di e tempo ey Prins Willem Alexander y Prinses Maxima. Despues e tabata usa e potret aki, na un forma no apropia pa show off cu su amigonan den e mundo criminal, na Hulanda y rond mundo.
