Diasabra dia 30 di november a tuma lugar e di 25 “Annual Charity Golf Tournament” organisa pa Rotary Club Aruba. E aña aki un biaha mas e team dinamico di Rotary Club Aruba a kibra tur expectativa na unda a recauda mas di Afl. 90,000,-. Tur fondo recauda lo bai bek na nos comunidad. Rotary Club Aruba lo reparti e fondo aki bao di diferente fundacionan y instancia nan na Aruba. E exito aki no tawata posibel sin e sosten continuo di nos “Platinum Sponsors”, cual ta Caribbean Mercantile Bank y Aruba Airport Authority.
E evento aki a trece 20 ekipo di golf hunto na The Links at Divi Resorts. Participantenan a wordo trata cu dushi cuminda, bebidanan refrescante, y un ambiente bibo cu a tene e animo halto durante henter dia. E evento a culmina den un anochi di celebracion cu a inclui un ceremonia di premiacion, premionan di rifa, un”auction”, y un cena delicioso.
E team ganador a resulta e team di Satex cu tabata consisti di Indira Ras, Pedro Teixeira, Greg Wever y Evan Haime. E team ganador a ricibi un premio cortesia di Digicel. Na di dos lugar y cu premio cortesia di Boolchand’s a keda e team di Nedd Brothers cu tabata consisti di Larry Nedd, Christopher Nedd, Luis Camara y Donovan Nedd. E team di Aruba Lottery cu tawata consisti di Hendrik, Juny Albert, Pery Young y Hipy Kock a keda na di tres lugar y a ricibi premio cortesia di Divino.
E atraccion un biaha mas tabata e “Ball Drop”, unda cu tur presente por a cumpra un bala di golf asigna na nan nomber. Durante e anochi esakinan a wordo laga los na un “hole” riba e golf course. Esun cu a logra e ‘closest to pin’ den e atraccion aki a gana un 65” TV cortesia di Lucky Electronics.
Ademas di esaki tabata tin e tradicional rifa cu a conta premionan actractivo cortesia di nos companianan local. Tambe a tene un mini-auction, cu diferente pakete atractivo. Pa medio di e actividadnan aki, e mesun participantenan a haya un oportunidad pa hasi nan contribucion adicional.
Presidente Diego Acevedo a keda masha contento y satisfecho cu e fondo recauda un biaha mas e aña aki. Esaki ta danki na e trabao duro cu e comite organisador ta hasi. “Mi ta hopi orguyoso di e comitr organisador cu un biaha mas a organisa un exitoso evento”. Miembro Milton van Brussel cu a lidera e comite organisador ta sigui na gradici tur e companianan cu a yuda Rotary e aña aki atrobe cu nan aparte. “Tur esaki ta hasi posibel pa Rotary Club Aruba sigui yuda esnan di mas necesidad den nos comunidad”.
A parte di e “Platinum Sponsors”, Rotary Club Aruba kier a gradici e “Premium Sponsors”, Divi Resorts, Elite Productions, Romar Trading y Zen Designs pa nan aporte. Un gradicimento ta bai pa nos “Silver Sponsors” Ennia, Just Sparks, Eagle Aruba Resort and Casino y ASD.
Tambe kier a duna un danki na e “Hole Sponsors”; Domino’s, Setar, Astec, Arugas, Guardian Group, Bon Bini Cargo, Plus Accountants, Euro Kitchen y Beter Homes N.V. Un gradicimento ta bai tambe na Ultimate Automobiles y Byd cu un biaha mas a patrosina e posibilidad di un “Hole-in-One”.
Un danki special ta bai na e patronisadornan riba e area di F&B, cu sin duda a contribui na un experiencia completo durante y despues di e evento.
Rotary Club Aruba kier a gradici un y tur cu e aña aki un biaha mas a deposita nan confiansa den e torneo aki. Na tur miembro di e comite organisador di Rotary Golf y tur otro miembro di cu di un of otro manera a duna nan sosten, contribuyendo na un evento exitoso. Nos ta spera di conta cu boso sosten atrobe na 2025 pa e di 26 edicion di Rotary Annual Charity Golf Tournament.
