Bijbel Genesis 3: 14-16, Dios Tata ta bisa na e colebra satanas: “Lo Mi trece enemistad entre abo y e muher, entre bo descendiente y e descendiente di e muher. E muher cu su descendiente lo trapa riba bo cabes y lo bo lastra bao di su pia.” E muher ta Maria, cu a obedece Dios y a acepta di ser mama di E Salbador. Maria Su descendiente, ta Cristo-Hesus y tur e sigidornan den Cristo-Hesus Su Iglesia. E descendiente di e colebra, ta esnan den secta cu no ta acepta Maria y ta persigi e Iglesia di Su Yiu Hesus. Maria a trapa riba e cabes di e colebra, pa medio si Su Yiu Hesus y pasobra Maria a acepta pa trece e Messias na mundo. Bijbel Revelacion 12: 17: “Awor e dragon a rabia contra e muher y el a bay haci guera na e demas yiunan di e muher.” Akinan e diabel tin rabia riba Maria y e diabel lo persigi e yiunan di Maria, den e Iglesia di Su Yiu Hesus. Bijbel Lukas 1: 41-43, Maria a bishita Su prima Elisabeth y Elisabeth a keda jena cu Spirito Santo y a bisa: “Di unda mi ta merece, cu mama di Mi Senjor ta bishita mi?” Maria ta Mama di Dios, pasobra Hesus ta E di dos Persona di E Santisima Trinidad, Maria ta Mama di E Eternal Yiu di Dios y Hesus mes ta Dios. Bijbel Huan 20: 28, akinan Apostel Tomas a bisa Hesus: “Mi Senjor y Mi Dios.” P’esey Maria ta wordo jama, Mama di Dios. Bijbel Huan 19: 25 – 27, aki Hesus na Crus claba, a mira Su Mama y Su Apostel Huan y E’l a bisa: “Muher, ata bo yiu eynan y despues E’l a bisa Huan: Ata bo mama eynan.” Akinan Hesus a ofrece nos Su Mama, pa nos acepta Maria como nos Mama, pa nos honrel’E, pa nos venerel’E y pa nos stimel’E manera Hesus ta stima Su Mama. Y e Apostel Huan cu ta representa e Iglesia di Hesus, a acepta Maria como mama. Tur creyente den Cristo-Hesus, ta miembro di un famia spiritual. Nos tur cu ta yiunan di Dios Tata, tin mester di un Mama spiritual (Maria) pa juda nos spiritualmente, mescos cu Hesus na chikito, tabata wordo guia pa Mama Maria. E palabra muher cu Hesus a expresa, no ta un ofensa, pasobra ta Dios Tata mes a expresa pa medio di Hesus, e muher den Genesis 3: 14-16, cu lo trapa riba e cabes di e colebra. Y Maria sa cu Su Yiu Hesus, ta Dios. Bijbel Lukas 1: 30-33, e angel Gabriel ta anuncia na Maria, cu lo E bira Mama di Hesus: “Senjor Dios lo dun’E e trono di Su antepasado David y te den eternidad, lo E ta Rey di descendientenan di Yakob y Su Reino lo no tin fin.” Hesus ta Rey di Universo den e Aliansa Nobo, cu ta e descendientenan di Israel nobo di Dios Tata, cu ta e Iglesia Universal. Bijbel Revelacion 12: 1, ta bisa: “Un senjal grandi a aparece na Cielo: Un muher bisti cu solo, cu luna bao di su pianan y riba su cabes un corona di diesdos strea.” Maria tin e Corona di diesdos Strea bisti y esaki ta simbolisa e oficio Real den Reino di Cielo. Bijbel Genesis 37: 9-11, aki Jozef ta sonja di mira con solo, luna y streanan ta buig su dilanti y esaki ta simbolisa, reinado of autoridad. Bijbel 1 Reinan 2: 19-20, “Ora cu Batsheba mama di Rey Salomon, a drenta den e cuarto di e Rey, pa papia cun’e riba asunto di Adonias, e Rey a lanta pa ricibi su mama y a buig su dilanti. Despues el a bolbe bay sinta riba su trono y a duna ordo pa nan trece un stoel di trono pa su mama, e mama a sinta na man drechi di su yiu Rey Salomon y a bis’e: Mi kier a pidi bo un fabor chikito, mi no ta spera cu bo lo nenga mi. Rey Salomon a contesta: Mi mama, pidi mi loke bo kier, lo mi no nenga bo.” Den Bijbel ta simbolisa, cu sinta na man drechi di un Rey, ta un lugar di mas honor den Reinado. Un Reina mama cu ta sinta na man drechi di su yiu cu ta Rey, ta simbolisa su comparticion den e autoridad Real di e Rey. Bijbel 1 Reinan 2:17-18, akinan Adonias a pidi Batsheba mama di Rey Salomon un fabor, pasobra abo e lo no nenga. Batsheba a contesta: “Ta bon, lo mi papia cu mi yiu pa bo.” Den e pasahe aki, e mama Batsheba ta presenta su mes como abogada y intercesora, pa hiba peticionnan na su yiu Rey Salomon. Adonias a reconoce, cu Rey Salomon lo no nenga su mama Reina. Bijbel Huan 2: 1-10, asina tambe Maria a intercede na Su Yiu Hesus, pa e pareha recien casa na Cana, cu binja a caba y Hesus a cambia 6 tinashi di awa den binja. Esaki tabata e prome milager cu Hesus a haci, pa medio di Maria. Maria como Reina y Mama, ta sinta na man drechi di Su Yiu Hesus, Maria ta abogada y intercesora pa tur Su yiunan den Iglesia di Su Yiu Hesus. Hesus como Rey di Universo, lo no nenga Su Mama Maria fabornan, manera cu Rey Salomon a bisa su mama Batsheba: “Mi mama, pidi mi loke bo kier, lo mi no nenga bo.”
Conclusion: Corda bon, na ora di bo morto, bo tin cu presenta bo mes dilanti Tribunal di Hesus Rey di Universo, sinta riba Su Trono y tambe lo bo mira sinta riba Su Trono, na man drechi di Hesus, Maria Reina di Cielo y di tera y bisti cu Solo, cu luna bao di Su pianan y riba Su Cabes un Corona di diesdos Strea.
Scirbi pa Seferino Tromp
