Liderasgo ta ora bo por pone bo mes riba bo ego, y reconoce hasta bo oponente. Esaki ta algo cu Mike Eman a faya barbaramente den e ultimo simannan y mas aun, riba nos dia di Himno y Bandera. Y esaki a cai den masha mal tera serca masha hopi hende, especialmente nos bishitantenan di Curacao, Boneiro, Sint Maarten y Sint Eustatius.
Den su afan pa impone su “storia”, ela falsifica “historia”.
Pa tur hende na Aruba ta obvio, cu si no tabata pa Betico Croes, awe nos no a celebra ni himno, ni bandera, ni Status Aparte. Simplemente pasobra AVP y e politiconan di fam Eman durante historia a vota CONTRA nos himno, nos bandera y nos lucha pa Status Aparte.
Pero loke mas a resalta ta e falta di liderasgo den e lider di nos pais actual Mike Eman. E no por ni menciona e nomber di Betico. Dicon? Su ego ta mucho grandi of su caracter ta mucho swak?
Cualquier cu ta e caso, lider di MEP Evelyn Wever-Croes a demostra kiko ta liderasgo autentico. E si a reconoce Henny Eman sr, Shon A Eman, Juancho Yrausquin cu a encamina e proceso pa busca e 2147 firmanan, y ela reconoce logicamente Betico Croes cu a logra nos himno, nos bandera y nos Status Aparte, y Nelson Oduber cu a logra scrap e fecha di independencia.
Danki Dios nos tin Evelyn Wever-Croes y nos por carga speransa cu pronto Aruba lo bolbe conoce liderasgo fuerte y autentico.
