WILLEMSTAD – Despues di a marka historia ku su outobiografía emoshonante MAFFIAMEID ku aktualmente ta den su di ocho imprenta, Nina Lindeborg ta bèk ku un dokumental titula NINA: E historia tras di MAFFIAMEID. Ora e proseso pa skibí un buki di e bida trágiko pero ku alabes konmovedor di Nina a kuminsá, esaki a fungí komo un atvertensia serio pa hóbennan pa no skohe un karera den kriminalidat. Nina a pasa den asina tantu kos ku e buki no por a kubri, ku e dokumental di kuater episodio ku ta pasa riba CARIFLIX, si ta elabora riba dje.
Apesar di un hubentut turbulento i un adultes marka pa prostitushon i wega di droga, ta remarkabel pa mira kon Nina a tuma rienda di su bida despues di a sinta un kastigu di mas di 12 aña. Awó Nina ta pasa su tempu papiando ku hóbennan den riesgo i mamanan soltero. Tambe e tin diferente otro proyekto emoshonante ku Nina ta trahando riba den futuro serkano.
E dokumental a keda produsí pa e talentoso duo German Gruber Jr. i Justin Kees, ken a traha aproksimadamente tres aña riba e produkshon. Esaki debí ku nan no kièr a usa e buki komo fundeshi i a opta pa un proseso mas intimo i visualmente impaktante. E resultado final ta un
obra magistral ku lo hiba bo den un variedat di emoshon i ta duna bo un bista kon bida di hende por hiba hopi buelta, pero ku semper tin espasio pa redimí i redefiní bo trayektoria.
Un historia kòrtiku
Ku diesdos aña, a ranka Nina fo’i su padrasanan na Kòrsou i mandé pa su mama na Hulanda. Su mama tabata traha komo prostituta, na entre otro Arnhem, huntu ku su pareja nobo. Nan tabata terorisá i abusa di Nina sin mizerikòrdia i asina a pone e hóben hui fo’i kas ku 15 aña. Ta sigui un bida ekstraordinario domina pa droga i prostitushon na Twente, Friesland, Groningen, Amsterdam i Rotterdam. Nina ta sumergí su mes profundamente den trafikashon di droga, i ta drenta den un relashon ku un di e narkotrafikante di más grandi di Hulanda, Surinam i Antias Hulandes. E ta bira un di e transportado di droga di más importante i ta hunga un papel estelar den e top di e sindikato. Ku su personalidat kolorido, pa años Nina ta logra di skapa e garanan di hustisia i por poko a skapa ku su bida. Al final, Nina ta bin realisá ku e bida di krímen no ta paga, i e ta keda kondená na e kastigu di más haltu ku un muhé a ser kondená pa un delitu di droga den historia di reino hulandes.
Ko-outor Hendrik Jan Korterink, ku a fayese na yanüari di e aña aki, a publiká varios ‘bestsellers’ kua ta inkluí Bruinsma BV, Haagse Penoze i Cor – e sekuestradó di Heineken, Cor van Hout.
Kumpra bo ‘voucher’
Pa sintonisá e kuater episodionan di NINA: E historia tras di MAFFIAMEID bo mester ‘download’ e app di CARIFLIX vía App Store of Google Play, traha un kuenta i kumpra e pakete na rason di 39,90 USD. ku bo tarjeta di krédito. Tambe bo por kumpra bo ‘voucher’ na TeleCuraçao i e otro puntonan di benta konosí riba nos islanan. Bishitá www.facebook.com/Maffiameid of Instagram @maffiameid pa mas informashon.
